Փաշինյանը, Մակրոնն ու Միշելը Ղարաբաղի՝ Ադրբեջանի մաս լինելու հարցում որևէ տարընթերցում չունեն Ալիևի հետ. Զոհրաբյան (տեսանյութ)

Նախկին պատգամավոր Նաիրա Զոհրաբյանը ֆեյսբուքյան իր էջում հրապարակել է Ալիևի ելույթը և կից գրել.

«Աստանայում, Նիկոլ Փաշինյանի ներկայությամբ Ալիեւն ասաց, որ Ղարաբաղն Ադրբեջան է ու ավելացրեց, որ Ղարաբաղի հայերի իրավունքների եւ անվտանգության հարցերը կարգավորվելու են Ադրբեջանի սահմանադրությամբ և ինքը որեւէ մեկի հետ չի պատրաստվում քննարկել Ադրբեջանի ներքին հարցերը։

Ալիեւն ասաց նաև ամենավտանգավորը՝ որ Պրահայում տեղի ունեցած բանակցությունների արդյունքից իր տպավորությունն այն է, որ Ղարաբաղի հարցով իր այս դիրքորոշումը որևէ մեկի կողմից տարընթերցման տեղիք չի տվել. այսինքն՝ բոլորը հասկացել ու ընդունել են, որ Ղարաբաղն Ադրբեջան է։

Փաստորեն, Փաշինյանը, Մակրոնն ու Շառլ Միշելը Ղարաբաղի՝ Ադրբեջանի մաս լինելու հարցում որևէ տարընթերցում չեն ունեցել Ալիևի հետ։

Ալիևի ելույթի ժամանակ Նիկոլ Փաշինյանն Աստանայում լուռ նստած էր ու եթե համաձայն չլինել Պրահայում Ալիևի ստացած տպավորությունների հետ, տարբերակ առաջին՝ քաղաքակիրթ տարբերակ. պիտի առնվազն ռեպլիկի կարգով հայտարարեր, որ Ալիևի տպավորությունը սխալ է, և տարբերակ երկրորդ՝ ոչ քաղաքակիրթ տարբերակ. ձեռքի տակ եղածը տար Իլհամ Հեյդարովիչի գլխին»։