Ջերմուկի հարցը քննարկվում է առանց համայնքապետի. «Հրապարակ»

«Հրապարակ» թերթը գրում է.

«Վայոց Ձորի մարզպետ Արարատ Գրիգորյանը երեկ մարզխորհրդի նիստ է անցկացել, որի ընթացքում քննարկել են սեպտեմբերի 13-14-ին Ադրբեջանի ագրեսիայի հետեւանքով «մարզում ստեղծված իրադրության եւ ձեռնարկվելիք միջոցառումների վերաբերյալ» հարցը, որը ներկայացրել է մարզպետ Արարատ Գրիգորյանը:

Բանն այն է, որ մարզխորհուրդն առաջին հերթին կազմված է հենց համայնքի վարչական ղեկավարներից, Վայոց Ձորի մարզն էլ խոշորացումից հետո ունի ընդամենը 5 համայնք՝ Արենի, Ջերմուկ, Վայք, Եղեգիս, Եղեգնաձոր, ըստ այդմ էլ՝ 5 ղեկավար։ Սեպտեմբերի 13-14-ին սկսված ադրբեջանական սադրանքներից ամենաշատ տուժած համայնքը Ջերմուկն է, սակայն խորհրդի նիստին, որի ժամանակ քննարկվել է տուժած համայնքների հարցը, ներկա չի եղել Ջերմուկի համայնքապետը։

Մեզ ասացին, որ նա շատ հազվադեպ է մարզխորհրդի նիստերին մասնակցում, այս անգամ էլ նրա փոխարեն նիստին մասնակցել է փոխհամայնքապետ Աշոտ Խաչատրյանը։ Խաչատրյանին հարցրինք, թե ինչու համայնքապետ Վահագն Արսենյանը չի մասնակցել մարզխորհրդի նիստին։ Պատճառաբանեց, թե արձակուրդում է։ Իսկ ընդհանրապես մասնակցո՞ւմ է, Խաչատրյանն արձագանքեց․ «Չգիտեմ, ինձ այդ հարցով մի դիմեք»։

Հետաքրքիր մեկ հանգամանք․ համայնքապետի՝ արձակուրդ մեկնելու վերաբերյալ հրաման չկա համայնքապետարանի պաշտոնական կայքում։ Վահագն Արսենյանը համայնքապետի պաշտոնը ստանձնել է 2021 թվականի դեկտեմբերի 17-ին, եւ դեռ 11 ամիսը չի լրացել, հետեւաբար, նա չէր կարող արձակուրդ գնալ, բայց եթե նույնիսկ իր հաշվին է գնացել, ապա պետք է հրամանը հրապարակվեր պաշտոնական կայքում»:

Առավել մանրամասն՝ թերթի այսօրվա համարում: