Սամվել Ալեքսանյանի (Լֆիկի) կնոջ ունեցվածքն ու որդնած բլինչիկը

Երաևնի Քանաքեռ-Զեյթուն վարչական շրջանում գործող «Երևան Սիթի» (Զեյթունի) սուպերմարկետը ժամանակավորապես փակվել է:

Newspress.am-ը տեղեկացավ, որ սուպերմարկետում ընթանում են սանիտարական ստուգումներ:

Սա պատահական չէ, քանի որ ԱԺ պատգամավոր Սամվել Ալեքսանյանին /լֆիկին/ պատկանող սիթիների ցանցում, հատկապես վերջին շրջանում, հաճախակի է հանդիպում ժամկետանց, անորակ ու համապատասխան չափորոշիչներից դուրս սնունդ:

Newspress.am-ը պարբերաբար անդրադարձել է «Սիթի»-ներում տիրող իրավիճակին. ակնհայտ խաբեություն ու խարդախություն, որի անմիջական «զոհը» դառնում է շարքային քաղաքացին: Այսինքն` մեզնից յուրաքանչյուրը…

Օրինակները շատ են.  հիշենք հենց վերջերս «Ալեքս Գրիգ» ՍՊԸ-ին պատկանող «Երեւան Սիթի» սուպերմարկետներում  վաճառվող այլուրի մեջ հայտնաբերված միջատները, երբ քաղաքացիներից մեկը, գնելով «Բաղրամյան» ընկերության ալյուր՝ 2 կիլոգրամանոց պարկով, դրա մեջ հայտնաբերել է սև բլոճ ու սպիտակ որդ:

Այսօր էլ հենց newspress.am-ում տեղ է գտել մի հրապարակում, ըստ որի «Երևան Սիթի» (Փակ շուկա) սուպերմարկետում վաճառվել է «որդնած բլինչիկ»…

Այս և նման շատ ուրիշ միջոցներ են, որ լցրել են Լֆիկի գրպանները ու նրան դասել հարուստների շարքում: Թեև մյուս կողմից էլ հարկ է նկատել, որ պատգամավորի դրամական միջոցների մեծ մասը նրա կնոջ՝ Շողերինա Մկրտչյանի անունով է հայտարարագրված։

Հետեւելով պատգամավորի վերջին տարիների գույքի եւ եկամուտների հայտարարագրերին ակնհայտ երևում է, որ Ալեքսանյանն  իր ամբողջ բիզնեսը սահուն փոխանցել է կնոջը, եւ եկամուտներն էլ վերջինս է ստանում:

Այնպես որ տիկին Շողիկը պատգամավորների կանանց մեջ, այսպես ասած,  ամենաունևորն է:

Հենց այս կնոջ հետ էլ փորձեցինք կապ հաստատել` պարզելու, թե ինչ է կատարվոում Սիթիների ցանցում և ինչպես է նա բացատրում տիրող խառնաշփոթ իրավիճակը:

Լրատվական կայքի անունը լսելով` տիկին Շողերինան նույնիսկ չհարցրեց, թե ինչու ենք զանգահարել, այլ պարզապես ասաց.

«Դուք ասեք, ես իրեն կփոխանցեմ…», -ասաց նա` նկատի ունենալով Սամվել Ալեքսանյանին:

Սակայն պարզաբանումներ ակնկալող առաջադրված հարցերին նա խուսափողական պատասխաններ հնչեցրեց: Իսկ դիտարկմանը, թե որպես «Ալեքս Գրիգ» ՍՊԸ սեփականատեր ինչպես կբացատրեք իրավիճակը, ասաց.  «Ինքը հիմա չի կարող պատասխանել… ես չգիտեմ, թե ինչ կասի ինքը, բայց ես ոչինչից տեղյակ չեմ…խնդրում եմ սուպերմարկետներին տվեք այդ հարցերը…»,- շփոթված պատասխանեց Շողերինան…

Ու հասկանալով, որ այդ «ԻՆՔԸ», նույն Լֆիկը,  իր ունեցվածքը հայտարարագրելով կնոջ անունով, սահմանափակել է նրա խոսելու իրավունքը, որոշեցինք բարի գիշեր մաղթել կնոջը, քանի որ նա ասելիք չուներ, կամ չէր կարող ասել, որովհետև կարող էր ավելորդ որևէ բան խոսել, ինչի մասին պետք է լռեր…

Ամեն դեպքում, հերթական անգամ համոզվեցինք, որ սանիտարական ստուգումը սիթիների ցանցում ոչ միայն տեղին է, այլ նույնիսկ ուշացված:

Մնում է սպասել, որ ստուգումներ կանցկացվեն Ալեքսանյանին պատկանող բոլոր սուպերմարկետներում և, որ ամենակարևորն է, այդ ստուգումները կտան իրենց շոշափելի արդյունքը…