Այսօր աղջիկ երեխայի միջազգային օրն է

Հոկտեմբերի 11-ը ՄԱԿ-ի կողմից հռչակվել է աղջիկ երեխայի միջազգային օր։

Ողջ աշխարհում աղջիկները բախվում են տարբեր խնդիրների՝ մի տեղ դա վաղաժամ ամուսնությունն ու ծննդաբերությունն է, մյուս տեղում՝ կրթությունից զրկելը, երրորդում՝ սեռական օրգանների ծիսական խեղումը…

Օրվա նպատակն է հանրային ուշադրության առարկա դարձնել աղջիկ երեխաների խնդիրները և պաշտպանել նրանց բռնությունից ու խտրական վերաբերմունքից։

Հայաստանում այսօր աղջիկ երեխաների նկատմամբ ծառացած, թերևս, մեծագույն խնդիրը պտղի սեռով պայմանավորված հղիության արհեստական ընդհատումներն են, որի պատճառով մեր երկրում ամեն տարի չի ծնվում մոտ 1500 աղջիկ եւ եթե այդ դինամիկան պահապանվի մինչեւ 2060 թվականը մենք կկորցնենք 93 000 աղջիկ կամ ապագա մայր:

Չնայած այդ երևույթը նվազեցնելու ջանքերին` ըստ «Չափազանց վաղաժամ ամուսնություններ. վերջ դնել երեխաների ամուսնությանը» զեկույցի` երեխաների ամուսնության հաճախականությունը վերջին տասնամյակում մնացել է նույնը Եթե ներկա միտումները շարունակվեն, ապա մինչև 2030-ը յուրաքանչյուր տարի ամուսնացող մանկահասակ հարսնացուների թիվը 2010-ի 14.2 մլն-ից հասած կլինի 15.1 մլն-ի՝ աճելով ավելի քան 14%-ով: Զարգացող երկրներում (բացառությամբ Չինաստանի) ամեն երեք աղջկանից մեկը ամուսնական դաշինք կմտնի մինչև 18 տարեկանը: