Արտակարգ դեպք Արարատի մարզում․ որսի ժամանակ՝ ոստիկանության ծառայողը հրազենային վնասվածք է ստացել ու տեղափոխվել հիվանդանոց

Արտակարգ դեպք Արարատի մարզում։ Հոկտեմբերի 7-ին, Ժամը 07։50-ի սահմաններում «Վեդի» բժշկական կենտրոնից ոստիկանության Արարատի բաժին ահազանգ է ստացվել, որ «էվենտերացիա, որովայնի հրազենային վանսվածք» ախտորոշմամբ՝ իրենց մոտ է տեղափոխվել մի քաղաքացի։

Ինչպես հայտնում է shamshyan.com-ը, հիվանդանոց են մեկնել ոստիկանության Արարատի մարզային վարչության պետ Սարիբեկ Ռուստամյանը, ոստիկանության Արարատի բաժնի պետ Արթուր Հակոբյանը։

Ոստիկաններն ու քննիչերը պարզել են, որ վիրավորը Արարատի մարզի բնակիչ 46-ամյա Արման Կարապետյանն է։

Մինչ բժիշկները բուժօգնություն էին ցուցաբերում վիրավորին, ոստիկանության Արարատի մարզային վարչության ծառայողները պարզել են, որ նույն օրը, ժամը 07։20-ի սահմաններում Ա․ Կարապետյանն իր ընկերներ՝ Արարատի մարզի բնակիչներ 46-ամյա Սամվել Մերվազյանի և 35-ամյա Մանուկ Նազարյանի հետ Nissan մակնիշի ավտոմեքենայով որս անելու նպատակով գնացել են Տափերական գյուղի վարչական տարածքում գտնվող հանդամիջյան վայր, որտեղ Ս․ Մերվազյանը ավտոմեքենայի առջև նստած վիճակում իր անվամբ գրանցված «ՄՌ-155» տեսակի 1 փողանի 12 մմ տ/չ ողորկափող հրացանը լիցքավորելիս, պատահաբար կրակել է, ինչի հետևանքով էլ ավտոմեքենայի հետնամասում նստած Ա․ Կարապետյանը մարմնական վնասվածք է ստացել։

Շամշյանի տեղեկություններով՝ վիրավոր Ա․ Կարապետյանն աշխատում է ոստիկանության Արտաշատի բաժնում, ինչի համար էլ մարզի ոստիկանապետ Ս․ Ռուստամյանի կողմից նշանակվել է ծառայողական քննություն։