Իշխանությունը որոշել է բոլոր ապաքաղաքական մարմինները զավթել՝ գործուղելով ՔՊ-ականների. «Հրապարակ»

«Հրապարակ» թերթը գրում է.

«ՔՊ-ականներն իրենց նախկին կուսակից Կարեն Անդրեասյանին երեկ գործուղեցին ԲԴԽ, նախ՝ շարքային անդամ, ապա՝ նախագահ։ Անդրեասյանը վերջերս է դուրս եկել ՔՊ-ից՝ այս պաշտոնին միայն անկուսակցականը կարող է ընտրվել։ Հաջորդ մարմինը ԿԸՀ-ն է, որի նախագահ կնշանակեն Վահագն Հովակիմյանին։

Իշխանությունը որոշել է բոլոր ապաքաղաքական մարմինները զավթել՝ գործուղելով ՔՊ-ականների։ Նիկոլ Փաշինյանն ընդամենը 2 տարի առաջ Սահմանադրական հանրաքվե էր նախաձեռնել, որ ՀՀԿ-ական Հրայր Թովմասյանին հեռացնի ՍԴ նախագահի պաշտոնից, եւ հայտարարում էր, որ նախկին հանրապետականը չի կարող ՍԴ անաչառ ղեկավար լինել, ՍԴ-ն հենց նման կուսակցականներով է տարիներ շարունակ եղել ընտրակեղծարարության «տանիքը», հիմա իր կուսակցին գործուղում է ԿԸՀ։

Երեկ ԱԺ նախագահ Ալեն Սիմոնյանից հետաքրքրվեցինք՝ ինչո՞ւ Հրայր Թովմասյանին չէր կարելի, իսկ Վահագն Հովակիմյանին կամ Կարեն Անդրեասյանին կարելի է։ Սիմոնյանն ասաց, թե նրանք այլեւս կուսակցական չեն, իսկ Կարեն Անդրեասյանը, ըստ Սիմոնյանի, այնքան անաչառ պաշտոնյա է եղել, որ նախկին իշխանությունների կողմից հալածանքների է ենթարկվել։ ԱԺ նախագահը, ով հրաժարվեց պատասխանել մեր հարցերին, չարձագանքեց նաեւ մեր դիտարկմանը, թե այդ հալածանքները ծագել են միջանձնային հարաբերությունների հողի վրա։

Իսկ Թովմասյանի մասով էլ ասաց, որ նրան ոչ թե կուսակցական լինելու համար են պաշտոնազրկել, այլ այն բանի, որ նրա հեղինակած Սահմանադրության շնորհիվ Սերժ Սարգսյանը երրորդ անգամ ընտրվեց պետության ղեկավարի պաշտոնում։

Չարձագանքեց նաեւ այն դիտարկմանը, թե այդ Սահմանադրությունն այսօր իրենց իշխանությանն է ծառայում։ Ասաց․ «Ժողովուրդը մեզ էդ մանդատը տվել է»։

Ի դեպ, Սերժ Սարգսյանն էլ էր ասում՝ ինչքան ուզենք, էնքան «կխփենք»։

Առավել մանրամասն՝ թերթի այսօրվա համարում