Չեմ մեղադրում ֆակուլտետի դեկանին. Հոխիկյանը՝ ԵՊՀ-ից իրեն հեռացնելու մասին

Հեռուստամեկնաբան, լրագրող Նաիրի Հոխիկյանը ֆեյսբուքյան իր էջում գրել է.

«Քիչ առաջ ծանոթացա Նիկոլ Փաշինյանի ընտանեկան կայք «Հայկական ժամանակին» ԵՊՀ ղեկավարության տված պարզաբանմանը՝ Նաիրի Հոխիկյանի հետ համագործակցությունը դադարեցնելու մասին։

Ի սկզբանե մտադիր չէի այդ տհաճ թեման շարունակելու, բայց քանի որ նախ արձագանքել էր ժուռնալիստիկայի ֆակուլտետի դեկանը, ապա ԵՊՀ ռեկտորատը, հասկացա, որ այդ մարդկանց համար ցավոտ է եղել իրականության վերհանումը։
Ինքս նշել եմ և հիմա էլ կրկնում եմ, որ չեմ մեղադրում ֆակուլտետի դեկանին, մանավանդ դեռևս 2022-ի մայիսին նույն անձը իր աշխատասենյակում ինձ ցույց էր տվել ԵՊՀ ռեկտորի հրահանգը առարկաների կրճատման վերաբերյալ՝ ինձ երաշխավորելով, որ ամեն ինչ կանի մեր համագործակցությունը շարունակելու համար։ Դեռ այն ժամանակ հստակ ասել եմ, որ հասկանում եմ քաղաքական իշխանության կամակատարների վարքագիծը և կհասկանամ, եթե դեկանը ազատվի ինձնից, ինչին նույն դեկանը արձագանքել է, որ ինքը կփորձի պայքարել ինձ համար, հնարավոր է, մի քանի առարկա միավորի, որ չկարողանան ռեկտորատին և իշխանությանը ոչ ցանկալի անձանցից ազատվել։

2022-ի սեպտեմբերի 5-ին ուսանողներս ինձ տեղեկացրել են, որ լուծարք կա։ ԵՊՀ վարչական շենքի մոտ պատահաբար հանդիպում եմ ժուռնալիստիկայի ֆակուլտետի դեկանին, ով շփոթված ասում է, որ ռեկտորատը նպատակահարմար չի համարել շարունակել համագործակցությունը մի քանի պատճառով։ Նախ, որ իմ դասավանդած առարկաներից մեկը չի եղել ուսումնական պլանում, այլ կերպ, անօրինական է եղել, ապա, ռեկտորի կողմից խնդիր է դրվել կրճատել դասախոսների թիվը և դասաժամերը, ինքն էլ չէր կարող չանել ՔՊ-ի նշանակած ռեկտորի հանձնարարությունը։ Մնացածի մասին առաջարկում է զանգով խոսել, քանի որ շտապում է ռեկտորի մոտ։ Ես մի քանի բան եմ ասում դեկանին, որի մասին չեմ բարձրաձայնի։ Դրանց ճշմարտացիության հետ դեկանը չի վիճում, բայց հետո այդպես էլ չի զանգում պարզաբանման համար։

Օրեր անց ֆակուլտետից տեղեկանում եմ, որ իմ դասախոսական և մասնագիտական հմտությունների մասին բամբասանքներ են տարածում, որպեսզի արդարացնեն ինձնից ազատվելը։ Եվ դա այն դեպքում, որ ֆակուլտետում դասավանդելու ընթացքում ուսանողների կողմից միշտ եղել է դասերին հաճախելու բարձր մասնակցություն և մեծ ակտիվություն, ինչը ուսանողությանը հետաքրքրելու վկայություն է։

Ես, իհարկե, չեմ նեղսրտել համալսարանում հրավիրյալ դասախոսի հնարավորությունից զրկվելու համար։ Սպասում էի, գիտեի, որ դեկանն ավելի վաղ է ստացել հրահանգը, պարզապես հարմար պահ է փնտրում։ Ծիծաղելի է ԵՊՀ պաշտոնական պարզաբանումը, թե 2.5 տարի առաջ որոշված է եղել հանել երկու առարկաները, որոնք դասավանդել է Նաիրի Հոխիկյանը։ Այսինքն այն ժամանակ, երբ ինձ հրավիրել են ԵՊՀ դասավանդելու, արդեն որոշած են եղել հանել առարկաները։ Եթե որոշված է եղել, պետք է հանվեր, իսկ եթե հիմա է արվել իբր թե հաստիքների կրճատման պատճառով, ապա մեր հանրությունը առնվազն պետք է իմանա, որ ԵՊՀ-ից հեռացվում են քաղաքական իշխանության ընդդիմադիրները, փոխարենը ֆակուլտետ են ներխուժում սորոսական ապազգային գրանտակերները և ՔՊ-ական պատգամավորների կանայք։ Զլմ-ները կարող են ստուգել, թե սեպտեմբերից ովքեր են սկսել դասավանդել այնտեղ։

Նման պարագայում ի՞նչ գործ ուներ Նաիրի Հոխիկյանը։ Ափսոսում եմ, որ լուսահոգի Գառնիկ Անանյանի ոտքի կանգնեցրած լավագույն ավանդույթներով, լրագրության հայկական դպրոց ֆակուլտետը վերածվել է նման վայրի։ Բազմաթիվ արժանավոր մասնագետներ կան, որոնցից հերթով ազատվում են քաղաքական կամ ազգային հայացքների պատճառով։

Սիրելի լրագրող ուսանողներ, ինչպես մեր դասերի ժամանակ եմ միշտ ասել, հիմա էլ հիշեցնում եմ, երբեք չմոռանաք, որ անկախ ամեն ինչից, լրագրողը պարտավոր է հայրենիք ունենալ, իսկ խոսքի ազատությունը չի նշանակում ցինիկություն ու այլասերում։ Իմ ուսանողները դա լավ գիտեն, ու ես վստահ եմ, որ կշարունակեն հենց այդ սկզբունքներով»: