«Ոչինչ չենք անում, հետո ասում ենք՝ ինչու է Ռուսաստանն ավելի ակտիվ հարաբերութjուններ կառուցում Ադրբեջանի հետ»․ բա չզբաղվի՞ այս տարածաշրջանով․ Քոչարյան

ՀՀ երկրորդ նախագահ Ռոբերտ Քոչարյանը Նենսի Փելոսիի ացը Հայաստան ու նրա հայտարարությունները դրական է համարում, սակայն հնարավոր չի համարում, որ ԱՄՆ-ն և Ֆրանսիան կարող են պատասխանատվություն ստանձնել Հայաստանի անվտանգության հետ կապված։ 

«Բոլոր քայլերը, որոնք օգնում են մեզ ապահովագրվել, բոլոր քայլերը, որոնք ուղղված են Ադրբեջանին զսպելուն, դրական եմ համարում, բայց պետք է իրատես լինել»,- ասաց Քոչարյանը` ասուլիսի ժամանակ։

Նա նշեց, որ վերջին շրջանում ԱՄՆ-ի ազդեցությունը Թուրքիայի վրա շեշտակի նվազել է, այնպես ինչպես Ռուսաստանի ազդեցությունը՝ Ադրբեջանի վրա։

«Ադրբեջանի նախագահն արդեն ուղիղ հայտարարում է` որևէ զանգի հետ հույս չկապեք։ Ո՞ւմ մասին էր այդ ակնարկը։ Հասկանալի է, չէ՞՝ ում էր ուղղված։ Հիմա այս վիճակը մենք պետք է ճիշտ գնահատենք ու չընկնենք հակառակ ծայրահեղության մեջ։ Ասենք` ՀԱՊԿ–ը չկա, Ռուսաստանը չկա, Ֆրանսիայից ինչ-որ օգնություն կուղարկեն։ Չի լինելու այդ օգնությունը։

Շատ լավ է, որ ինչ–որ քայլեր անեն, դիտորդ ուղարկեն, դիտորդը գա` հայտարարություններ անի։ Բայց տվյալ դեպքում հողի վրա ռեալ հնարավորություններ ունի Ռուսաստանը, որը կաշկանդված է ուկրաինական պատերազմով, որի դերակատարությունն այստեղ նվազել է նաև մեր պարտության պատճառով, և որն այսօր փորձում է դաշնակցային հարաբերություններ կառուցել նաև Ադրբեջանի հետ»,- ասաց Քոչարյանը` հավելելով, որ դա այսօր բխում է ՌԴ-ի ազգային շահերից, ու չի կարելի դրա համար մեղադրել Ռուսաստանին։

Մյուս կողմից, Ռոբերտ Քոչարյանը նկատում է, որ Հայաստանի իշխանությունն այսօր ոչինչ չի անում Ռուսաստանին համոզելու, որ Հայաստանն իրեն պետք է, ու նաև դեռ իրենից ինչ–որ բան է ներկայացնում տարածաշրջանում։

«Ոչինչ չենք անում, հետո ասում ենք` ինչու է Ռուսաստանն ավելի ակտիվ հարաբերություններ կառուցում Ադրբեջանի հետ։ Բա ի՞նչ անի։ Եթե դու չկաս, չզբաղվի՞ այս տարածաշրջանով։ Իհա՛րկե, զբաղվելու է»,- ասաց Քոչարյանը։