Մեր բանակցողը մշտապես ճնշման ներքո է և այս պարագայում ամենակարեւոր խնդիրը բանակցողին փոխելն է. Սեյրան Օհանյան (տեսանյութ)

Պաշտպանության նախկին նախարար, ԱԺ Հայաստան խմբակցության պատգամավոր Սեյրան Օհանյանը չի ցանկանում մեկնաբանել առաջին նախագահ Լևոն Տեր-Պետրոսյանի հայտարարությունները, բայց ցանկանում է ընդգծել մի քանի հանգամանք:

Նա Եռաբլուրում, լրագրողների հետ զրույցի ժամանակ նկատեց, որ փաստն այն է, որ Հայաստանի հանրապետությունը գտնվում է կապիտուլյացիոն վիճակում, և այդ վիճակում հենց այնպես չի հայտնվել։ 

պաշտպանության նախկին նախարարը ընդգծեց, որ նորօրյա պատմության ընթացքում մենք հպարտացել ենք մեր անկախ պետությամբ, ինքիիշխանությամբ, ազատությամբ, Արցախի ազատությամբ, ազատագրմամբ, ու պետականաշինությամբ։ Բայց այս վերջին տարիների մեր պատմությունը ցույց տվեց, որ իշխանության եկան մարդիկ, որոնք ձախողեցին ամեն ինչ՝ բանակցային գործընթացը։

«30 տարիների կատարած քրտնաջան աշխատանքը բերել էր բանակցային ներուժի ձևավորման, որի վրա հենվելով՝ մենք կարող էինք շարունակել մեր պատմությունը՝ և անվտանգություն, ևարտաքին հարաբերություններ։ Այդ ձախողումն է, որ բերեց պատերազմի»,-ասաց նա:

Սեյրան Օհանյանը նկատեց, որ զոհերի զգալի մասը կարող էր չլիներ՝ եթե պետությունը թիկունք կանգներ բանակին, եթե ապահովեր անվտանգություն, ապահովեր մարտական գործողությունների խորքում ինժեներական սարքավորումներ, կահավորեր պաշտպանական բնագծերը։

«Մենք կարող էինք ավելի շատ զոհեր ունենալ, բայց ունենալ հաղթանակ»,-ասաց Օհանյանը։ Նրա խոսքով՝ ցավն այն է, որ մեծ թվով զոհերի դեպքում պարտվել ենք․ «Այս իշխանությունները այս պարտությունից հետո ամբողջությամբ տապալել են արտաքին քաղաքականությունը, տապալել են պաշտպանական քաղաքականությունը, բանակաշինությունը, պետական կառավարումը: Հետպատերազմյան տարիներին անհաջողությունների գործընթացները շարունակական են դարձրել: Այս պայմաններում նոյեմբերի 9-ի և մնացած այլ փաստաթղթերը փաստացի կնիքն են նրա, ինչ այսօրվա իշխանությունները կատարել են։ Այս իշխանություններն են, որ գտնվում են ճնշման, պարտադրման ներքո»,-ադաց Օհանյանը։

Նա առաջարկեց ստեղծված վիճակից դուրս առաջին կարևոր պայամանը՝ փոխել իշխանությունը:

«Գա իշխանություն, որը կարող է արտաքին քաղաքականություն վարել, և մեր ներքին ազգային երաշխիքները ձևավորել: Արտաքին քաղաքականության մեջ փաստ է, որ պարտված իշխանությունը ճնշման ներքո է գտնվում, մեր բանակցողը մշտապես ճնշման ներքո է և այս պարագայում ամենակարեւոր խնդիրը բանակցողին փոխելն է»,-ընդգծեց Օհանյանը: