2 ամսվա ծառայողին, առանց պատասխանատուի, տարել են դիրքեր․ Ներքին Հանդում զինվորներին անտառապահներն ու որսորդներն են փնտրել․ ծնողներն անորոշ վիճակում են (տեսանյութ)

Սեպտեմբերի 13-ին, ադրբեջանական ԶՈւ ստորաբաժանումների հարձակումից հետո, անհետ կորած զինծառայողների հարազատներն անորոշության մեջ են։ Վերջիններս տարբեր կառույցների են դիմել և այժմ էլ Պաշտպանության նախարարության դիմաց են բողոքի ակցիա անցկացնում։

Ծնողները ՊՆ-ում հանդիպեցին ներկայացուցչի, սակայն վերջինս հստակ պատասխան չէր տվել։

Անհետ կորած զինծառայող Սամվել Անթանյանի հայրը՝ Հայկ Անթանյանը, լրագրողների հետ զրույցում նշեց, որ և՛ իր, և՛ քրոջ որդիները Կապանում, իսկ ավելի կոնկրետ՝ Ներքին Հանդի զորամասում են եղել։ Նա պատմեց, որ իր որդուն վերջին անգամ տեսել են ինժեներական աշխատանքներ կատարելիս։

«Սամվելը ծառայում էր Ներքին Հանդում: Երկու ամսվա ծառայող էր: Առանց որևէ պատասխանատուի ուղարկել են մարտական դիրքեր: Սեպտեմբերի 12-ի երեկոյան ժամը 10-ի կողմերը երեխեքին բարձրացրել են՝ շինարարական աշխատանքներ կատարելու»,-ասաց անհետ կորածի հայրը։

Նա պատմեց, որ ծնողներին մի կառույցից մյուս կառույց են ուղարկում։ Մասնավորապես, իր որդու պարագայում, Հայկ Անթանյանը նշեց, որ ոչ ոքից չեն կարողանում կոնկրետ տեղեկատվություն ստանալ։

«Ոչ մի հրամանատար չկա, գնդում էլ ենք եղել, զորամասում էլ ենք եղել, պատասխանող չկա: Դիվիզիոնի հրամանատարը ողջ է, բայց չենք տեսել, երբ գնում ենք, ասում են՝ գնացել է դիրքեր: Դիրքեր ենք գնում, ասում են՝ իջել է զորամաս»,- ասաց նա:

Ծնողները ցանկացել են որոնել և գտնել իրենց զավակներին, սակայն նրանց ասել են, որ որսորդները կփնտրեն՝ անտառին ծանոթ են և թույլ չեն տվել ծնողներին մտել տարածք։ 

Այսօր արդեն նրանց ասում են, թե այդ տարածքում որոնումներն ուշացված են։

Անհետ կորածի ծնողը հայտարարեց նաև, որ ՊՆ ներկայացուցչի հետ հանդիպումն իրենց ոչինչ չտվեց և լրագրողներին ցույց տվեց որդու նկարը։

Մանրամասները՝ տեսանյութում