Ալեն Սիմոնյանի եղբոր հետ առնչվող «Եվրոասֆալտ» ՓԲԸ-ն տույժերի և տուգանքների չի ենթարկվի

168.am-ը գրում է` 2019 թվականին հիմնադրված և ԱԺ նախագահ Ալեն Սիմոնյանի եղբոր՝ Կառլեն Սիմոնյանի հետ կապվող Եվրոասֆալտ ՓԲԸ-ն երկու տարվա ընթացքում ոչ միայն հասցրել է ասֆալտ փռելու գործում դառնալ մեկ անձից գնումներ կատարողների շարքում առաջատարը, այլ նաև պայմանագրային պարտավորությունները չկատարելու՝ ասֆալտը նախատեսված ժամկետում չփռելու համար չի ենթարկվի տույժերի և տուգանքների։

Տարածքային Կառավարման և զարգացման նախարար Գնել Սանոսյանն է Կառավարության համաձայնությանը ներկայացրել մի որոշում, որով նախարարությունը նախատեսում է երկարաձգել «ԵՎՐՈԱՍՖԱԼՏ» ՓԲԸ-ի հետ 2021 թվականի սեպտեմբերի 3-ին կնքված պայմանագրով աշխատանքների կատարման համար սահմանված ժամկետը՝ կապալառուի նկատմամբ չկիրառելով տույժեր:

Ժամանակին չկատարված աշխատանքի դիմաց պայմանագրի երկարաձգումը հիմնավորվում է նրանով, որ այս ընկերությունը սահմանված ժամկետում չի կատարել պարտավորությունները վերգետնյա գազատարի հենասյուների տեղափոխման, ինչպես նաև ճանապարհային երթևեկության ինտենսիվ և ծանրաբեռնված լինելու պայմանների պատճառով առաջացել է աշխատանքների կատարման անհնարինություն, հենց այդ հիմքով էլ նախարարը կարծում է, որ պետք չէ տույժի ենթարկել: Իսկ, թե քանի միլիոն դրամ տույժի մասին է խոսքը՝ որոշման նախագծում նշված չէ։

30.000-ը որ 200.000 լինի, կարծում եմ՝ վարորդը կմտածի, ինչպես վարի, որ քաղաքը չաղտոտի. Քաղաքապետ
Տեսչական մարմինը 1.5 տարի էական վտանգների մասին հասարակությանը չի ասել, հիմա են ասում. բիզնեսի շահը մարդկային կյանքերից վեր են դասել. Բաբկեն Պիպոյան
«Այնքան են լկտիացել, որ արդեն ծեծում են տաքսիների վարորդներին». Կոտայքում տրանսպորտի գնի բարձրացումը՝ վեճերի պատճառ
Նշենք, որ Գնել Սանոսյանի ղեկավարած նախարարության ներկայացրած ընկերությանը տույժի չենթարկելու առաջարկին դեմ է արտահայտվել Ֆինանսների նախարարությունը՝ նշելով, որ այդ հանգամանքը շինարարական նորմերի ապահովման տեսակետից կանխատեսելի էր ինչպես պատվիրատուի համար՝ նման բնույթի և ծավալի աշխատանքներ պատվիրելիս, այնպես էլ՝ կապալառուի համար, որպես իր ռիսկով ձեռնարկատիրական գործունեություն իրականացնող միավոր։

Հիշեցնենք, որ ըստ ՀԵՏՔ-ի՝ Գնել Սանոսյանի ղեկավարած նախարարության առաջարկով տույժի չենթարկված «Եվրոասֆալտ» ՓԲԸ-ի 90 %-ի բաժնետերը Սվետլաննա Պողոսյանն է, որի գրանցման հասցեում է հաշվառված 24-ամյա Արգինե Արսենի Միքայելյանը, որն աշխատում է շինարարական մեկ այլ՝ «Թի Էս Քնսթրաքշն» ՓԲԸ-ում, որը հիմնադրվել է 2019 թվականին և գործում է այն նույն հասցեում, որտեղ գործում է նաև «ԵվրոԱսֆալտ» ընկերությունը, իսկ «Թի Էս Քնսթրաքշն» ՓԲԸ-ում փոխտնօրեն է աշխատել Ալեն Սիմոնյանի եղբայրը՝ Կառլեն Սիմոնյանը։

Նշենք նաև, որ ըստ Fip.am-ի՝ 2020 թվականին «Թի Էս Քնսթրաքշնը» 5 միլիոն դրամ է նվիրաբերել ՔՊ-ին, որն արտացոլվել է կուսակցության տարեկան հաշվետվության մեջ: