ՏՏ ոլորտի յուղը մենք ենք քերում, իսկ ոլորտի լավագույն կադրերին քերում են մեզանից

Հովիկ Աբրահամյանն այսօր այցելել է «Սինոփսիս Արմենիա» ընկերություն: Լրագրողների հետ ճեպազրույցում վարչապետն ընդգծել է, որ Հայաստանի տեղեկատվական տեխնոլոգիաների ոլորտում առկա է մեծ ներուժ և անհրաժեշտ է հնարավորինս օժանդակել դրա իրացմանը:

«Կառավարությունը շարունակելու է հետևողականորեն աջակցել տեղեկատվական տեխնոլոգիաների ոլորտի զարգացմանը: Հիմա մենք քննարկում ենք ազգային ծրագիր ունենալու հարցը, և պետք է մեր բոլոր հնարավորությունները օգտագործենք այն կյանքի կոչելու համար», – նշել է Հովիկ Աբրահամյանը:

Վարչապետը ՏՏ ոլորտի քսան տոկոսանոց աճով ուրախանալիս և ընկերություններ շրջայց կատարելիս մոռանում է, որ ոլորտի զարգացման համար կառավարությունը լուրջ քայլեր պետք է իրականացնի: Փոխարենը այսօր ոլորտում ներդրումները պակասում են: Ներդրումների համար հարկավոր են միջազգային կապեր, գիտության զարգացում և որ ամենակարևորն է՝ ներդրողը պետք է այստեղ պաշտպանված լինի օրենքով։ Նա պետք է վստահ լինի, որ խնդիրների դեպքում օրենքը կգործի, անակնկալներ չեն լինի։

Հայաստանի ներդրումային միջավայրի մասին գնահատականներ տալիս միջազգային մի շարք կառույցներ արձանագրում են, որ տնտեսության զարգացման համար կարևորագույն ոլորտները ապահովագրված չեն վայրիվերումներից, կոռուպցիոն ռիսկերից ու օրենքների կտրուկ փոփոխություններից:

Բացի այդ ՏՏ ոլորտում մոտ 4000 թափուր աշխատատեղ կա, որը չի համալրվում մեր մասնագետներով: Պատճառը շատ պարզ է ՝չկա պետության կողմից համարժեք վերաբերմունք և համարժեք վարձատրություն:
Ստացվում է` կառավարությունը քերում է ՏՏ ոլորտի յուղը, իսկ Սիլիկոնյան հովիտը Հայաստանից քերում է մեր լավագույն կադրերին: