Էրդողանի միջնորդությամբ, Ուկրաինան Մեդվեդչուկին և 55 ռուսների փոխանակել է ավելի քան 200 գերիների հետ, այդ թվում՝ «Ազով»-ի 5 հրամանատարի

Սեպտեմբերի 22-ի գիշերը ուկրաինական իշխանությունները հայտարարել են ռուսական լայնածավալ ներխուժման սկզբից ի վեր գերիների ամենամեծ փոխանակման մասին։ Կիևին հաջողվել է վերադարձնել 215 ուկրաինացի զինվորական, այդ թվում՝ «Ազովստալ»-ի ավելի քան 100 պաշտպան։ Ուկրաինայի նախագահ Վլադիմիր Զելենսկու խոսքով՝ 200 գերիների համար Ռուսաստանը ընդունել է Վլադիմիր Պուտինի կնքահորը՝ քաղաքական գործիչ Վիկտոր Մեդվեդչուկին, ով մեղադրվում է Ուկրաինայում դավաճանության մեջ։ Մարիուպոլի պաշտպաններից հինգ բարձրաստիճան սպաներ փոխանակվել են 55 ռուս ռազմագերիների հետ։ Ռուսաստանի իշխանությունները դեռ պաշտոնապես չեն մեկնաբանել փոխանակումը։

Փոխանակումը, որին ներգրավված էին միանգամից մի քանի պետություններ, գաղտնի էր պահվում մինչև վերջին պահը։ Նրա մասին առաջին տվյալները ուկրաինական լրատվամիջոցներին ու Telegram ալիքներին հայտնվեցին միայն չորեքշաբթի՝ սեպտեմբերի 21-ի երեկոյան։ Պաշտոնապես Ուկրաինայի իշխանությունները հաստատել են փոխանակումը կեսգիշերից հետո, երբ ազգային հեռուստամարաթոնը ցույց տվեց նախագահ Վլադիմիր Զելենսկու հանդիպումը նրա գրասենյակի ղեկավար Անդրեյ Երմակի հետ։

Ուկրաինայի նախագահը հայտնել է, որ Ազովի հրամանատարների ազատ արձակումը տեղի է ունեցել Թուրքիայի նախագահ Ռեջեփ Թայիփ Էրդողանի միջնորդությամբ։ Կողմերը պայմանավորվել են, որ ազատ արձակվածները կմնան Թուրքիայում մինչեւ պատերազմի ավարտը։