Էթիկայի հանձնաժողով. օրհնված կոռուպցիա

Բարձրաստիճան պաշտոնատար անձանց էթիկայի հանձնաժողովը ստեղծվել է 2012 թվականի հունվարի 9-ին: Բարձրաստիճան պաշտոնատար անձանց էթիկայի հանձնաժողովի առաքելությունը երկրում գործող հանրային ինստիտուտների նկատմամբ հասարակության վստահության բարձրացումն է: Այս մասին գրում է էթիկայի հանձնաժողովի կայքը: Որքանո՞վ է իրականում հանձնաժողովը ծառայում իր նպատակին, և արդյո՞ք այս 4 տարիների ընթացքում հասարակության վստահությունը երկրի հանրային ինստիտուտների նկատմամբ բարձրացել է:

Նշենք, որ հասարակությունը մինչև էթիկայի հանձնաժողովի ստեղծումը դիտորդի դերում էր, նայում էր, թե ինչպես է բաժան-բաժան արվում վարկը, ծաղկում կոռուպցիան, հարստություններ է դիզվում: Կարճ ասած աշխատավարձով ապրող պաշտոնյաների ունեցվածքը օրեցօր ավելանում է:

Էթիկայի հանձնաժողովի ստեղծումից հետո շատ բան չի փոխվել, պաշտոնյաների ունեցվածքը երկրի աղքատության ֆոնին նորից ավելանում է, անհայտ նվիրատուների թիվը մեծանում է:

Էթիկայի հանձնաժողովի հայտարարագիրը մեծամասամբ ներկայացնում է, թե տվյալներ չկան, հաճախ է պատահում, որ պաշտոնյաները չեն ներկայացնում բազմաքանակ ու բազմամիլիոնանոց ավտոմեքենաները, բազմաճյուղ դղյակների քանակը և այլն: Վերջին շրջանում էլ կարծես խելոքացել են, նշում են միայն աշխատավարձերը, կամ փոխառություններից ստացված եկամուտները, որը ևս քիչ թիվ չի կազմում:

Իսկ հանձնաժողովը լիազորություն չունի քննություն իրականացնելու, թե ովքեր են պաշտոնյաների ընկեր-նվիրատուները և այդ որ մատուցած ծառայության համար են նրանք թանկարժեք նվերներ ստանում:

Էթիկայի հանձնաժողով պետք է զբաղվի պաշտոնատար անձանց շահերի բախման և էթիկայի կանոնների խախտումների բացահայտմամբ: Ցավոք, որևէ օրինախախտ մինչ օրս համարժեք պատասխանատվության չի ենթարկվել:

Եվ գուցե դա է պատճառը, որ մեր պաշտոնյաները հանգիստ վայելում են օրինական կոռուպցիոն նվիրատվությունները:

Հարց է առաջանում, թե ինո՞ւ են ստեղծվում նման հանձնաժողովները, երբ երբևէ չեն բռնում մեկի ձեռքից ու հարցնում` եղբայր քեզ որտեղի՞ց այսքան միլիոն և ո՞վ է նվիրել:

Պարզապես Էթիկայի հանձնաժողովի ռեեստրը, որտեղ պարզ երևում է այս կամ այն պաշտոնյային նվիրատվության չափը, ոմանց ընդամենը հնարավորություն է տալիս իրենց մասնաբաժինն ունենալ այդ նվիրատվություններից և դրանով սահմանափակվում է ռեեստրի ֆունկցիան: