Իշխանությունները երկրի անվտանգությունն ավելի ցածր են գնահատում, քան անձնական շահերը. Արման Թաթոյան

44-օրյա պատերազմի ձեռագիրն ամբողջությամբ կրկնվում է: Այս մասին լրագրողների հետ հանդիպմանն ասաց նախկին ՄԻՊ Արման Թաթոյանը։

Նրա դիտարկմամբ իշխանությունները քաղաքական վախ ունեին, որ իրենց նկատմամբ մարդկանց դժգոհությունը չառաջանա և չէին բարձրաձայնում Ադրբեջանի թշնամանքի մասին:

«Փոխանակ քայլեր ձեռնարկեինք դրանց մեր գյուղերից հեռացնելու, ցույց տանք, որ մեր գյուղերի համար մեկուսացման, հումանիտար խնդիրներ են առաջանում, հիշում եք, թե ինչ արշավ սկսվեց. պետական բարձրաստիճան պաշտոնյաները հայտարարում էին, թե ադրբեջանցիներն իրենց դիրքերում են, որևէ խնդիր չունենք։ Այս ամենը հիմքեր էին ադրբեջանական իշխանությունների համար, ամրացնում էր նրանց, որովհետև մենք ենք ասել, թե դուք ձեր դիրքերում եք գտնվում»։

Թաթոյանն ասաց, թե իշխանությունները երկրի անվտանգությունն ավելի ցածր են գնահատում, քան անձնական շահերը։

Մինչդեռ Ադրբեջանի պետական քաղաքականությունն այլ ուղղվածություն ունի: Թաթոյանի խոսքով՝ այն շարունակում է իր քաղաքականությունը։ 

«Տեսեք, երեկ քարտեզներ էին հրապարակում, թվում էր, թե ցնդաբանություն է, բայց դա իրենց պետական քաղաքականությունն է։ Սա նրանց հիմնարար պետական քաղաքականությունն է։ Իրենք խաղաղասեր են ձևանում՝ աշխարհի աչքին շղարշ գցելու համար, իսկ մենք ի՞նչ ենք անում։ Երբ չենք արձանագրում խախտումները, ցույց չենք տալիս թշնամանքը, պարզ է, որ նրանք բարենպաստ դիրքերում են հայտնվում»,- նշեց նա։