Հիմա ամեն ինչ կախված է մեզանից, առկա են բոլոր նպաստավոր պայմանները. Ղազինյանը` տարածաշրջանային զարգացումների մասին

Վաղուց եմ նշել, որ մեր տարածաշրջանում Ռուսաստանի ազդեցությունը թուլանալու պարագայում, այդ տեղին հավակնելու են Իրանն ու Թուրքիան: Այս մասին ֆեյսբուքյան իր էջում գրել է ԱԺ նախկին պատգամավոր Արթուր Ղազինյանը:

«Այսօր Ռուսաստանը՝ գտնվելով Թուրքիայից անթույլատրելի մեծ կախվածության մեջ և մխրճված լինելով ուկրաինական կոնֆլիկտի մեջ, օբյեկտիվորեն չի կարողանում մրցել Թուրքիայի հետ, ինչի հետևանքով տարածաշրջանում զգալիորեն մեծացել է Թուրքիայի (ադրբեջան) ազդեցությունը:

Սա իրողություն է, որից մենք փախչել կամ այն փոխել չենք կարող, հետևաբար մեզ մնում է սթափ գնահատել նոր ձևավորված իրողությունները, հաշվարկել մեր շահերը, գտնել մեր դաշնակիցներին, պայմանավորվել նրանց հետ, գույքագրել ռեսուրսները և մտնել ակտիվ պայքարի մեջ:

Իրանը, ինչպես և սպասվում էր, ոչ մի պարագայում չի համակերպվելու Թուրքիայի աճող ազդեցության հետ և հայտ է նեկայացնելու Ռուսաստանի թողած ազդեցությունը վերցնելու և տարածաշրջանում ուժերի նոր բալանս հաստատելու համար: Այդ մասին Իրանը ոչ միայն ուղիղ տեքստով հայտարարում է վերջին մեկ տարվա ընթացքում, այլ նաև ձեռնարկում է կոնկրետ քայլեր իր շահերը պաշտպանելու համար: Այն չի կարող հանդուրժել, որ Ադրբեջանի և Թուրքիայի կողմից արգելափակվի իր ելքը դեպի Սև ծով, ինչի կանխման նպատակով պատրաստ է ընդհուպ մինչև ռազմական բախման Թուրքիայի և Ադրբեջանի հետ:

Որքան էլ զարմանալի լինի, ԱՄՆ և ԵՄ անդամ-պետությոնների շահերը համընկել են Իրանի շահերի հետ, որին միացել է նաև Հնդկաստանն ու մասամբ նաև Չինաստանը: Այս չհրապարակված դաշինքն ի զորու է ոչ միայն կանխել Թուրքիայի նեո-օսմանյան նկրտումները, այլ նաև լուրջ ու ծանր հարված հասցնել Թուրքիային: Թուրքիայի պատերազմի մեջ մտնելու դեպքում Հունաստանը՝ ԱՄՆ աջակցությամբ, կբացի երկրորդ ճակատ, իսկ այդ իրավիճակում անման չի մնա նաև Սիրիան՝ արդեն Ռուսաստանի և Իրանի առարկայական աջակցությամբ:

Էրդողանի տոտալ ձախողման համար պատճառ կարող է դառնալ նաև եկող տարվա հունիսին Թուրքիայում սպասվող նախագահական ընտրությունները, որտեղ Էրդողանի հաղթելու շանսերը շատ քիչ են, իսկ ռազմական էսկալացիան ու Թուրքիայի հնարավոր անհաջողությունը կկործանի Էրդողանի իշխանությունը:

Ինչ վերաբերվում է Հայաստանին, ապա նախ և առաջ պետք է հեռացնել «անվտանգության սպառնալիք» դարձած իշխանությունը, ձևավորել ռազմաքաղաքական կառավարման կենտրոն, իրականացնել ռազմական, տնտեսական, մարդկային և ենթակառուցվածքային ռեսուրսի ՏՈՏԱԼ մոբիլիզացիա և գնալ ՀԱՅՐԵՆԱԿԱՆ պատերազմի, կերտել նոր Սարդարապատ և ՀԱՂԹԵԼ:

Հ.Գ. Հիմա ամեն ինչ կախված է մեզանից, առկա են բոլոր նպաստավոր պայմանները, իսկ, Աստված մի արասցե, ձախողվելու պարագայում ՈՉ ՄԵԿԻՆ իրավունք չեն ունենա մեղադրել: Մենք կլինենք ՄԻԱԿ մեղավորը...»: