«Մենք էլ ցանկացանք արյուն տալ, ասացին` չեք կարող». ուսանողներն աջակցում են առաջնագծին` ինչով կարող են. հարկավոր են նաև արյան դոնորներ (տեսանյութեր)

Այս օրերին, երբ հայ-ադրբեջանական սահմանին լարվածություն է, իսկ ավելի կոնկրետ` թշնամու ԶՈւ-ը ներխուժել է Հայաստանի Հանրապետության սուվերեն տարածք ու ռմբակոծել անգամ քաղաքացիական խաղաղ տարածքներ, երկիրը պահող հայկական ԶՈւ-ին թիկունքից բարոյական ու ֆիզիկական աջակցության անհրաժեշտություն կա։

Իհարկե, կան կոնկրետ իրեր ու սարքավորումներ, որոնց անհրաժեշտությունն այս պահին զգում է առաջնագծում գտնվող զինվորն ու ՄՈԲ-ը, սակայն ամենքը փորձում են օգտակար լինել նրանով` ինչով կարող են։

Newspress.am-ը ներկայացնում է բժշկական համալսարանի քոլեջի բաժնի ուսանողների նախաձեռնությունը։ Մեզ հետ զրույցում նրանք վստահեցրեցին, որ անմիջական կապ են հաստատում զինվորների հետ (քանի որ նրանց մեջ ունեն նաև հարազատներ) և ճշտում` ինչ է անհրաժեշտ, կամ արդյոք ուղարկված բեռը տեղ հասե՞լ է, թե՞ ոչ։ Ուսանողներից մեկն ասաց, որ արդեն մի քանի անգամ օգնություն են ուղարկել սահման ու անգամ զինվորներն  իրենց նամակներ են ուղարկել։ Երիտասարդներն ու նաև այլ բաժիններից նախաձեռնությանը միացած աղջիկները գիտակցում են, որ առաջանագծում թշնամու դեմ մարտնչող զինվորի համար ավելի գլոբալ հարցեր պետք է լուծվեն, բայց իրենք անում են այն, ինչ կարողանում են։

Ուսանողներից մեկը նշեց, որ իրենց մյուս ընկերներն անգամ օգնում են արյան դոնոր գտնելու հարցում։

«Մենք էլ ցանկացանք արյուն տալ, բայց ասացին, որ տարիքը չի համապատասխանում` չեք կարող»,-ասացին մեզ հետ զրույցի բռնված ու զինվորներին ամեն գնով օգնել ցանկացող ուսանողները։

Զրույցի մանրամասները` տեսանյութում

Արմինե Մկրտումյան