Հայտնի է ձյունի մեջ հայտնաբերված կիսամերկ և ցրտահարված տղամարդու ինքնությունը

Այսօր հունվարի 15-ին, Արտաշատ քաղաքի բժշկական կենտրոն է տեղափոխվել կիսամերկ ու սառած մի տղամարդ:
Լուրը newspress.am-ի հետ զրույցում հաստատեցին ԲԿ-ի վերակենդանացման բաժանմունքի աշխատակիցները, որտեղ էլ անմիջապես տեղափոխել են տղամարդուն և կաթիլային են ներարկել:

Ոստիկանության աշխատակիցները պարզել են, որ քաղաքացին Արմավիրի մարզի Բերդիկ գյուղի բնակիչ` 44-ամյա Ռուբիկ Ղրդիլյանն է:

Նրան հայտնաբերել են ոգելից խմիչքի ազդեցության ներքո` ընկած ձյունի մեջ: Թեև բժշիկները տղամարդու վիճակը գնահատել են ծանր, սակայն վերակենդանացման բաժնի աշխատակցի պնդմամբ` նա եղել է գիտակից վիճակում և անսխալ պատասխանել բոլոր հարցերին:

Այժմ Ռուբիկ Ղրդիլյանը գտնվում է «Երևան» բժշկական կենտրոնում` վերջույթների ցրտահարման ախտորոշմամբ:

Հիշեցնենք, որ այսօր` ժամը 10.39-ին ՏԿԱԻՆ տեղեկատվություն է ստացվել, որ Արարատի մարզի Բերդիկ գյուղի դպրոցի մոտակայքում սառցահարված, կիսամերկ տղամարդ է ընկած:

Դեպքի վայր է մեկնել թիվ 25 ՀՓՋ-ի օպերատիվ խումբը:

Մինչ հրշեջ-փրկարարների կանչի վայր հասնելը՝ շտապօգնության աշխատակիցները անձը չպարզված տղամարդուն հոսպիտալացրել են Արտաշատ քաղաքի ԲԿ: