Կամավորներին թույլ չեն տալիս բարձրանալ առաջնագիծ եւ օգնել ժամկետայիններին. Կամավորական Արթուր Մարկոսյանն իրավիճակը ներկայացրել է Գորիսից (տեսանյութ)

Կամավորականներին ահազանգում են, որ իրենց չեն զինում ու թույլ չեն տալիս մեկնել առաջնագիծ։ «Փաստինֆո»-ի հետ զրույցում կամավորական Արթուր Մարկոսյանը պատմել է, որ իր ջոկատով եկել է Սյունիք, դիմել է, որպեսզի զենք տրամադրեն և թույլ տան բարձրանալ դիրքեր՝ մասնակցելու հայրենիքի պաշտպանությանը, սակայն հրաժարվել են իրենց զենք տրամադրել:

«Քանի ջոկատ եկավ՝ Հայաստանի տարբեր տեղերից, գրանցում են անունը, բայց չեն կանչում, որ անունը պետք է գրեն ու չգիտեմ՝ ինչքան սպասենք, ո՞ւմ է պետք, մենք ո՛չ դրա ժամանակը ունենք, ո՛չ մեր հայրենիքն այդքան ժամանակ ունի, առավել ևս, որ հենց հիմա մեր տղաները թշնամու հետ կռիվ են տալիս, այդ տղաներն էլ ժամանակ չունեն, նրանք օգնության կարիք ունեն, ինչի՞ն սպասենք»,-ասաց Մարկոսյանը:

Զրուցակիցը, որն այդ պահին Գորիս համայնքում էր, տեղեկացրեց, որ հենց զրույցի պահին էլ մարտերը շարունակվում են, կրակոցների ձայներ են լսվում.
«Իմացա, որ երեկ 44-րդ պոստը ադրբեջանցիները գրավել են բայց մեր տղաները սեղմել են ու այսօր հետ են վերցրել, հիմա դրա համար մենք ուզում ենք շուտ գնանք դիրքեր ու հասնենք տղերքին, ինչ կա, հետ վերցնենք, սպասելու ժամանակ չունենք»,-ասաց Արթուր Մարկոսյանը։