Բալասանյանի աշխատավարձն ու գյումրեցու «համբերության բաժակը»

2016թ-ի սեպտեմբերին Գյումրիում սպասվում են քաղաքապետի ընտրություններ: Այսօր շրջանառվում է հիմնականում 3 թեկնածուի` Գյումրու նախկին քաղաքապետ Վարդան Ղուկասյանի, ԱԺ պատգամավոր Մարտուն Գրիգորյանի և Գյումրու գործող քաղաքապետ Սամվել Բալասանյանի անունները: Մարտուն Գրիգորյանը և Վարդան Ղուկասյանը չեն ուզում ժամանակից առաջ ընկնել և հաստատել իրենց թեկնածության առաջադրման մասին շրջանառվող լուրերը:

newspress.am-ի հետ զրույցում խոսելով իր թեկնածության մասին` «աստվածասեր», «աստվածավախ» Վարդան Ղուկասյանը վկայակոչեց Աստծուն. «Աստված ցույց կտա… ժամանակը կգա կերևա»:

Հարկ է նկատել, որ Վարդան Ղուկասյանը, ով մի առիթով նշել է, թե «Գյումրիի մասով SOS է պետք հնչեցնել» և իր տված հարցազրույցներից մեկում ակտիվ քննադատել է Սամվել Բալասանյանին` ասելով, որ նա հույս չի ներշնչում, newspress.am-ի հետ զրույցում զերծ մնաց ավելորդ մեկնաբանություններից, նկատելով, սակայն, որ եթե Մարտուն Գրիգորյանն ու Բալասանյանն իրար հետ թեկնածություն առաջադրեն, ապա քաղաքապետի պաշտոնում կընտրվի Գրիգորյանը:Թե ինչու, նա հորդորեց հարցնել ժողովրդին:

Բալասանյանը ընտրություններին ընդառաջ սրտաճմլիկ կոչով դիմեց գյումրեցիներին, թե ինքը իր աշխատավարձը չի ստանա այնքան ժամանակ, քանի դեռ Գյումրիում նույնիսկ մեկ անօթևան բնակիչ կա: Հավանաբար Բալասանյանը մտածում է, որ ինքը երկա՜ր, շատ երկա՜ր է ղեկավարելու Գյումրին: Բայց գյումերցին այլևս համբերություն չունի սպասելու, թե Բալասանյանի աշխատավարձով երբ ու քանի անօթևան ընտանիքի հարց կլուծվի: