Իշխան Սաղաթելյանին իր գործընկերները տարան և «փուռը տվեցին»․ Ալեն Սիմոնյանն նրան լուրջ չի վերաբերվում

Ազգային ժողովի նախագահ Ալեն Սիմոնյանը, գոնե քաղաքական առումով,  Իշխան Սաղաթելյանին այլևս լուրջ չի վերաբերվում։ Այս մասին նա ասաց լրագրողների հետ ճեպազրույցում՝ անդրադառնալով «Հայաստան դաշինք» խմբակցության պատգամավոր Սաղաթելյանի հայտարարությանը, թե պատրաստվում են իմպիչմենտի գործընթաց սկսել։

«Ինքը լուրջ քաղաքական գործիչ չէ, ինքն իրեն սպառել է, իրեն իր գործընկերները տարան և շատ հաջող ձևով «փուռը տվեցին»՝ հա՛մ դաշնակցական գործընկերները, հա՛մ հանրապետական գործընկերները։ Ինչքան բան է ինքն ասել, ուզո՞ւմ եք հերթով ասեմ, ասում էր՝ մեզ մի ժամ մնաց, երկու ժամ, հետո մեկ-երկու օր և այլն։ Ինքն այլևս լուրջ չէ»,- ասաց Սիմոնյանը։

Հարցին՝ ընդդիմության շարքերում պառակտում տեսնո՞ւմ է, Սիմոնյանը պատասխանեց. «Դե պառակտումը որն է, կան Ռոբերտ Քոչարյանի մի քանի հոգին, կան դաշնակցականները, որոնք պարտադրում են իրենց կամքը, որովհետև մեծամասնություն են և կան, այսպես ասած, ֆրիլանսերներ, որոնք փորձում են իրենց առօրյա հարցերը լուծել, բայց մի քիչ մնացել են թակարդի մեջ: Որովհետև ուզում են դուրս գալ այդ ավտոբուսից, բայց պարոն Քոչարյանը ավտոբուսի դռները իրենց համար չի բացում»,- ասաց Սիմոնյանը։