Ադրբեջանը, ավելի ճիշտ՝ Թուրքիան, այստեղ ամեն պահի կարող է սկսել ռազմական գործողություններ. ռազմական փորձագետը՝ Ադրբեջանի ՊՆ-ի սադրանքների մասին

Ակտիվ ռազմական գործողություններից առաջ Ադրբեջանը սկսում է քարոզչական- տեղեկատվական պատերազմ և այդ պատերազմի մեջ մտնում են նաև նմանատիպ հաղորդագրությունների տարածումն իրենց ռազմական գերատեսչության կողմից, որպեսզի իրենք հետագայում կարողանան լեգիտիմացնել այն բոլոր հավանական ռազմական գործողությունները, որոնք պետք է կիրառեն: Այս մասին NEWSPRESS.am-ի հետ զրույցում ասաց ռազմական փորձագետ Կարեն Հովհաննիսյանը՝ խոսելով Ադրբեջանի ՊՆ-ի սադրիչ հայտարարությունների մասին, որոնք ամեն օր տարածվում են և հայկական կողմին մեղադրում կրակելու մեջ: 

«Ամբողջ խնդիրն այն է, որ Ադրբեջանը ոչ միայն առաջնորդվում է հստակ հայտարարություններ տարածելով, այլ նաև փորձում է լարվածություն մտցնել առաջնագծում: Երեկ տեղի ունեցած կրակոցի հետևանքով զոհը հենց դրա հետևանքն է: Այսինքն՝ Ադրբեջանի ուզածն այս փուլում կարծես թե ռազմական գործողությունների վերսկսումն է, թեկուզ լոկալ առումով»,- ասաց Հովհաննիսյանը: 

Հարցին, թե իսկ որքանո՞վ են հավանական լայնամասշտաբ ռազմական գործողությունները, ռազմական փորձագետը պատասխանեց. «Ես, ճիշտն ասած, լայնամասշտաբ ռազմական գործողությունների չեմ սպասում, սակայն լոկալ գործողություններ հնարավոր են, չեմ բացառում»: 

Դիտարկմանը, թե այդ դեպքում ի՞նչ են վկայում թուրք-ադրբեջանական համատեղ զորավարժությունները կամ, օրինակ, Փաշինյանի այսօրվա հայտարարությունը հնարավոր էսկալացիայի մասին, Հովհաննիսյանը պատասխանեց. «Ադրբեջանն ամեն պահի, ավելի ճիշտ՝ Թուրքիան, այստեղ ամեն պահի կարող է սկսել որոշակի ռազմական գործողություններ: Ինչո՞ւ եմ ասում՝ բացառում եմ լայնամասշտաբ ռազմական գործողություները, որովհետև եթե նախկինում իրենց համար հիմք ունեին՝ Լեռնային Ղարաբաղի տարածքը, ապա այսօր նրանք չունեն այդ հիմքը, որովհետև Ադրբեջանի նախագահն անընդհատ հայտարարում է, որ Լեռնային Ղարաբաղի հարցը լուծված է, և չկա այդ հարցը: Այսինքն՝ միջազգային հանրությունն իրեն ասում է՝ եթե չկա այդ հարցը, ապա դու ի՞նչ ռազմական գործողություններ ես սկսում: Այստեղ արդեն հարցը գնում է այլ դաշտ, այսինքն՝ «զանգեզուրյան միջանցք», և Ալիևը փորձում է անընդհատ ասել, որ եթե դուք դա չանեք խաղաղ ճանապարհով, ապա մենք կանենք ռազմական ճանապարհով: Այս առումով, չի կարող սկսել լայնամասշտաբ պատերազմ սահմանի ամբողջ երկայնքով՝ Տավուշից մինչև Մեղրի»: 

Միևնույն ժամանակ, Հովհաննիսյանը չի կարծում, թե միջազգային հանրությունը որևէ կերպ կզսպի Ալիևի ախորժակը:

«Չեմ կարծում, թե միջազգային հանրությունը որևէ բան կանի, միջազգային հանրությունն ընդամենը հանդես կգա անհասցե հայտարարություններով, կոչ անելով և այլն, և այդ անհասցե հայտարարություններից թևավորվելով՝ հնարավոր է, որ Ադրբեջանն իր ռազմական գործողությունները շատ ավելի ակտիվացնի»,- ասաց մեր զրուցակիցը:

Ճշտող հարցին, թե այդ դեպքում ինչը պետք է դառնա զսպող մեխանիզմը, որպեսզի Ալիևը չգնա էսկալացիայի, փորձագետը նշեց, որ միակ զսպող օղակը բանակի արդիականացումն է լինելու և բանակի ուժեղացումը: Այսինքն՝ դա արդեն ոչ թե զսպող, այլ կանխարգելիչ կլինի:

Զրուցեց՝ Աստղիկ Հովհաննիսյանը