Եթե գնդապետին ձերբակալեին, նրա տականք որդին աչքով չէր անի, մեր վրա չէր ծիծաղի. (տեսանյութ)

Վազգեն Սարգսյանի անվան ռազմական ինստիտուտում նախորդ տարավա հունվարին դաժանաբար սպանված կուրսանտ Հայկազ Բարսեղյանի սպանության գործով հերթական դատական նիստը հետաձգվել է, քանի որ ռազմական ոստիկանությունը կրկին չէր կարողացել ապահովել ծառայության մեջ գտնվող Վարազդատ Սաֆարյանի ներկայությունը դատարանում։ Դատական հաջորդ նիստը նշանակվել է փետրվարի 4-ին: Հիշեցնենք, որ դատաքննության հետ քննվում է նաեւ Վարազդատ Սաֆարյանի գործը, ոչ թե Հայկազ Բարսեղյանի սպանության, այլ նրա սպանության մեջ մեղադրվողների հետ միասին այլ կուրսանտների ծեծելու դրվագով:

newspress.am-ի հետ զրույցում սպանված կուրսանտի հայրը` Արկադի Բարսեղյանը նշեց, որ լուրջ մտահոգություններ ունի, դատական գործընթացի մասով, քանի որ արդեն հինգերորդ դատական նիստն է հետաձգվում: Մեղադրյալներն էլ փորձում են ի օգուտ իրենց ժամանակ ձգել. «Ամեն անգամ, ժպիտը դեմքներին գալիս են դատարան: Այսօր էլ Գնելը հարազատներին աչքով տվեց, ինչը ցույց է տալիս, որ արխային է, կապեր ունի, բայց ինչ էլ անեն` խիստ պատժվելու են»:

Արկադի Բարսեղյանը նաև վստահություն հայտնեց, որ ժպտալու, աչքով տալու, իր պահվածքով սպանված կուրսանտի ծնողներին բորբոքելու ռիսկ Գնել Թևոսյանը չէր ունենա, եթե նրա պաշտոնաթող գնադապետ հայրը ևս ձերբակալված լիներ. «Ինստիտուտի պետի տեղակալն է եղել, գնդապետ, չի կարողացել որդուն սանձել, ընենց տպավորություն է, որ Գնելն է գնդապետ եղել»:

Հիշեցնենք, որ ըստ մեղադրական եզրակացության՝ ռազմական ինստիտուտի կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը 2015թ-ի հունվարի 29-ին ժամը 02:00-ից 03:00-ի սահմանում զորամասի առաջին գումարտակի առաջին մարտկոցի թիվ 408 ննջարանում առանձնակի դաժանությամբ, խուլիգանական դրդումներով սպանել են կուրսանտ Հայկազ Բարսեղյանին:

Մանրամասները՝ տեսանյութում