Գյումրիի ‎քաղաքապետարանը որոշել է փողոցների անձրևաջրերում փողեր լվանալ (լուսանկարներ)

Գյումրիի թիվ 45 ավագ դպրոցի հարակից փողոցը՝ Այգաբացի 3-րդ շարքն ամբողջովին անմխիթար վիճակում է։

Գյումրիի քաղաքապետարանը թեև որոշել է ասֆալտապատման հարց լուծել, սակայն, ինչպես ասում են, աչքը սարքելու փոխարեն՝ ունքն էլ հետն է քանդել։ Ամբողջ մայթեզրը քանդված է, ինչն իր հերթին դժվարացնում է անցանելիությունը և մուտքը դեպի դպրոց։

Ստացվել է այնպես, որ, քաղաքային իշխանության համար, երևի թե «անկանխատեսելի» անձրևներն իրենց սև գործն են արել, ու քանդված փողոցը լցվել է անձրևաջրերով։ Գոյացած ցեղաջրերն էլ ավելի են դժվարանցանելի դարձրել փողոցը։

NEWSPRESS.am-ը այս լուսանկարները վերցրել է Շիրակի մարզպետ Նազելի Բաղդասարյանի եղբոր՝ Արման Բաղդասարյանի էջից։ Վերջինս ՔՊ-ի ցուցակով ընտրվել է Գյումրիի ավագանու անդամ, սակայն դուրս է եկել ՔՊ-ից․․․

Նա այս լուսանկարները տեղադրելով իր էջում՝ «խոստացել է», որ «այս տարի փողոցն ասֆալտապատվելու է», թե կոնկրետ երբ՝ չի մանրամասնել։ Նա նշել է նաև, թե իբր շատ է նեղվում բնակիչներին անհանգստություն տալու համար և խնդրին «‎ժամանակավոր լուծում կտրվի, մինչ ասֆալտապատումը»․․․

Իհարկե, շատ հետաքրքրիր է, թե ինչպես է մարզպետի եղբայր Բաղդասարյանը պատկերացնում անձրևաջրերով լցված ցեխոտ փողոցների պատճառած անհամարությունները վերացնելուն ուղղված «‎ժամանակավոր լուծում»-ը։

Հարց է նաև, թե այդ ինչպես է պատահում, որ քաղաքի փողոցների վերանորոգման աշխատանքերը շատ հաճախ համընկնում են աշնան հետ, երբ սկսվում է անձրևների «սեզոնը»։

Այս դեպքում երկուսից մեկը՝ կա՛մ «‎Բնակկոմունալ և շրջակա միջավայրի պահպանության բաժնի պետ» բաժնի աշխատակիցներն իրենց տեղում չեն՝ որպես մասնագետ, կա՛մ որոշել են փողոցների անձրևաջրերում փողեր լվանալ։

Ամեն դեպքում, մինչ Այգաբացի 3-րդ շարքն ասֆալտապատվի՝ դպրոցի ուսուցչա-աշակերտական կազմը՝ թաղամասի բնաիչների հետ, ստիպված կլինեն փողոցով անցնելիս թռչկոտել՝ ցեխաջրերից ու փոսերից խուսափելու համար։

Արմինե Մկրտումյան