Աղբահանության մեքենաներն ու ջրցանները շարքից դուրս են եկել, իսկ տեր կանգնող չկա. քաղաքապետը մամուլ չի՞ կարդում (լուսանկար, տեսանյութ)

NEWSPRESS.am-ն արդեն անդրադարձել է այն հարցին, թե «Աղբահանություն և սանիտարական մաքրում» ՊՈԱԿ-ի նոր տնօրեն Հովհաննես Մանուկյանն ինչպես է վատնում ՊՈԱԿ-ի բյուջեն. աղբարկղերը ժամանակին չեն դատարկվում, քաղաքը պատշաճ չի մաքրվում, աղբատարները շարքից դուրս են եկել, մեքենաների շարժիչները, մեկը մյուսի հետևից, խափանվում են, ու աղբահանող ընկերությունն էլ «ձեռքից գնում է»․․․

Մեր հրապարակումից հետո դրական տեղաշարժ չի եղել:

Երբ պատրաստվում էինք կրկին անդրադառնալ խնդրին՝ ընկերության ներսում այդ պահին շարժիչի խափանումով կար 9 մեքենա: Դեռ նոր էինք սկսել նյութը գրել, երբ մեր աղբյուրը տեղեկացրեց մեզ, որ ևս մեկ մեքենայի շարժիչ խափանվեց:

Ինչպես արդեն ավելի վաղ նկատել էինք, շարժիչների խափանման հիմնական պատճառն այն է, որ մեքենաների համար նոր որակյալ մասեր գնելու փոխարեն կամ ձեռք են բերվում էժանագին մասեր, կամ էլ երբեմն եղած մասերը լվանում ու իբրև նոր մաս՝ դնում են մեքենայի վրա.․․

Որոշ պահեստամասեր էլ պարզապես վերածվում են թափոնների:

Սրանից բացի, մեզ հասած տեղեկություններով՝ «բենզինը խառնում են սոլյարկային», որի հետևանքով մեքենան սկսում է յուղ թողնել ու շարժիչներն ամբողջովին շարքից դուրս են գալիս:

Նկարում պատկերված է, թե ինչպես է թափվում մեքենայի յուղը:

Եթե սկզբնական շրջանում փչացած մեքենաները փոխարինվում էին ռեզերվային մեքենաներով, ապա այսօր արդեն ռեզերվային մեքենաներ չկան, իսկ 30 գործող մեքենայից 10-ն արդեն շարքից դուրս են եկել:

5-6 մեքենա կա ջրցան, մնացած ջրցանների շարժիչները տեղափոխել են աղբատարի վրա, իսկ ջրցան մեքենայի վարորդին գործից հեռացնում են:

Մեր տեղեկություններով՝ տնօրեն Հովհաննիսյանը շաբաթվա մեջ 2-3 անգամ է հաճախում ընկերություն, իսկ քաղաքապետ Հրաչյա Սարգսյանն էլ մատների արանքով է նայում այս ամենին ու աղբահանությամբ զբաղվող ընկերությունը, բարձիթողի վիճակի ենթարկվելով, օրեցօր շարքից դուրս է գալիս:

Հարկ է նկատել, որ այսօր՝ Երևանի քաղաքապետարանի սեպտեմբերի 5-ի գործակարգավարական խորհրդակցության ժամանակ, Հրաչյա Սարգսյանը հայտարարեց, թե քաղաքի հետ կապված նորությունները մամուլից է իմանում:

Այս տրամաբանության մեջ հուսանք, որ նա կընթերցի հրապարակումն ու կտեղեկանա աղբահանող ՊՈԱԿ-ում տիրող բարձիթողի մասին: 

Նկատենք նաև, որ ՊՈԱԿ-ի աշխատակիցներին հանձնարարվել է աղբահանության, ջրցանի կամ որևէ այլ աշխատանք կատարելու ժամանակ 20 վարկյանանոց նկարահանումներ անել՝ հավանաբար այդ աշխատանքներով քաղաքապետի կամ հասարակության աչքերին թոզ փչելու նպատակով /այս հանձնարարականի վերաբերյալ առկա է ձայնագրություն/:

Ներկայացնում ենք նաև ՊՈԱԿ-ից մեզ տրամադրած տեսանյութը, որտեղ երևում է, թե ինչ անմխիթար վիճակում են գտնվում մեքենաները, իսկ վաղը, հավանաբար, նաև այդ վիճակում կլինի նաև քաղաքը՝ կորչելով աղբի մեջ:

Արմինե Մկրտումյան