«Խաղաղության օրակարգի» համար վճռականություն է անհրաժեշտ. լուծումները հեշտ չեն. Նիկոլ Փաշինյան

Դուք տեղյակ եք, որ երեկ Բրյուսելում Եվրախորհրդի նախագահի միջնորդությամբ տեղի է ունեցել հանդիպում Ադրբեջանի նախագահի հետ։ Մենք մամլո հաղորդագրություն ենք տարածել, որտեղ նշված են քննարկված թեմաները, ինչպես նաև որոշումները, որոնք կայացվել են։ Այս մասին ՀՀ կառավարության նիստի ժամանակ ասաց Նիկոլ Փաշինյանը՝ նշելով, որ կայացած քննարկումը ծավալուն է եղել և հեշտ չի եղել։

«Ես ուզում եմ արձանագրել, որ մեր նպատակադրումները շարունակում են մնալ և պիտի շարունակեն մնալ այնպիսին, ինչի մասին ես հայտարարել եմ իմ հրապարակային ելույթներում։ ՀՀ կառավարությունը որդեգրել է «խաղաղության օրակարգը» (չակերտները՝ խմբ.) և էստեղ էլ մեծ վճռականություն է անհրաժեշտ այդ օրակարգը կյանքի կոչելու համար։ Մենք բոլորս պետք է հասկանանք, որ դա հեշտ չէ, պարզ չէ և հնարավոր լուծումներն էլ ակնհայտ չեն։ Մենք պետք է շարունակենք հետևողական աշխատել։ Նաև կարծում են, որ անհրաժեշտություն է, ինչպես նաև մեր ժողովրդի ցանկությունն է, որ մեր տարածաշրջանում հաստատվի տևական և համապարփակ խաղաղություն։ Մենք պետք է ավելի ու ավելի շատ կենտրոնանանք այս խնդրի լուծման վրա»,- նշեց Փաշինյանը։

Նրա խոսքով՝ այս պահին այլ մանրամասներ չի կարող հաղորդել, քանի որ այն, ինչ պամանավորվել են, համառոտ ներկայացված է։ Եթե հետագայում լինեն մանրամասներ, առաջարկներ, որոնք անհրաժեշտ կլինեն քննարկվել, ապա կառավարության, հանրության և քաղաքական ուժերի հետ անպայման կքննարկվեն։