Ինչո՞ւ է ցորենի գինը իջել, շաքարավազինը` ոչ

Այսօր կառավարության նիստում վարչապետ Հովիկ Աբրահամյանը ՏՄՊՊ հանձնաժողովի նախագահ Արտակ Շաբոյանից հետաքրքրվեց արդյոք ալյուրն էժանացե՞ լ է:

«Այո, էժանացել է ալյուրը, ցորենը, բենզինը, ավտոգազը: Մասնավորապես, ալյուրի գները տարվա կտրվածքով նվազել են մինչև 30 տոկոսով: Սա մեծ չափով պայմանավորված է ռուսական ռուբլու արժեզրկմամբ, քանի որ ալյուրն ու ցորենը ներկրվում է ՌԴ-ից»,- նշեց Շաբոյանը:

Վարչապետն էլ իր հերթին հարցրեց՝ եթե ալյուրի գինը 30 տոկոսով նվազել է, ինչո՞ւ հացի գինը չի նվազում: ՏՄՊՊՀ նախագահն ասաց, որ նվազում է, բայց ոչ 30 տոկոսի չափով եւ նշեց, որ հացի արտադրության ոլորտում կան հարյուրավոր եւ հազարավոր տնտեսվարողներ, եւ հակամրցակցային համաձայնություններ չեն կարող այս դաշտում լինել:

Վարչապետը Շաբոյանին առաջարկել է գործ չունենալ հարյուր հազարների հետ, այլ բռնել տասնյակ խոշորների և հասկանալ, թե ինչու գները չեն իջեցնում:

Հերթական անգամ կառավարությունում շրջանցվեց կառավարության շաքարավազի գնի հարցը, որի միակ ներկրողը պատգամավոր Սամվել Ալեքսանյանն է: Եթե ալյուրի ու ցորենի գնանկումը կապված է Ռուսաստանից ներկրելու և ռուսական ռուբլու արժեզրկման հետ, ապա նույն շաքարավազը ևս ներկրվում է Ռուսաստանից և նույն Մոսկվայում այսօր շաքարավազի մեկ կիլոգրամը վաճառվում է 290 դրամով: Ինչու վարչապետը երբևէ չի հիշատակում շաքարավազի գինը, որը համարվում է լայն սպառման ապրանք:

Ստացվում է այնպես, որ վարչապետի դժգոհությունն հասցեագրվում է ոչ յուրայինին, իսկ յուրայինները գործում են այնպես, ինչպես ուզում են: