Հովիկ Աբրահամյանը կհեռանա՞ սեփական կամքով

Վարչապետ Հովիկ Աբրահամյանը տարին ավարտեց ու սկսեց գործարարների հետ հանդիպումով ու խորհուրդներ ստեղծելով: Ժամանակին Տիգրան Սարգսյանն էր խորհուրդներ ստեղծում ու պետբյուջեից հսկայական գումարներ հատկացնում այդ խորհուրդներին: Բայց դրանք, ինչպես ժամանակը ցույց տվեց անօգուտ կառույցներ էին, որոնք պազապես պորտաբույծի պես սնվում էին պետական բյուջեից: Հովիկ Աբրահամյանը նույն ճանապարհն է ընտրել որոշակի առանձնահատկությամբ: Հանդիպում է գործարարներին, աշխատանքային ընթրիք է ունենում, ձեռքի հետ էլ տնտեսության ու արտահանման խնդիրներ քննարկում:

Բայց անգամ Հովիկ Աբրահամյանին հուսախաբ է անում ՌԴ վարչապետը, Գայդարյան տնտեսական համաժողովի ժամանակ հայտարարելով`պետք է պատրաստվել ամենավատթարին: Նավթի գները որեւէ հույս չեն տալիս, ինչը հարկադրում է վերանայել բյուջեն, չկան որեւէ հեռանկարներ ոչ արեւմտյան, ոչ արեւելյան ուղղություններով:

Եթե Ռուսաստանի վարչապետն է հայտարարում տնտեսական աղետի մասին, նշանակում է Հայաստանը, որ բոլոր ճյուղերով կապված է Ռուսաստանի հետ, ավելի լուրջ խնդրի առաջ է կանգնում, և ընթրիքով կամ արտահանման խորհրդով հարց չի լուծվի, կամ կլուծվի այնպես, ինչպես կոռուպցիայի հարցերը մինչ օրս լուծեց վարչապետի կողմից ստեղծած կոռուպցիայի խորհուրդը:

Այնպես որ, առաջիկայում եթե կառավարությունը լուրջ քայլեր չձեռնարկի` կնշանակի վարչապետը սեփական կամքով հեռացող կառավարության կուրս է ընտրել: