Էրդողանը Հունաստանին Լոզանի հաշտության պայմանագիրը միտումնավոր խախտելու մեջ է մեղադրում

Թուրքիայի նախագահ Թայիփ Էրդողանը Հունաստանին մեղադրել է Լոզանի խաղաղության պայմանագրի դրույթները, մասնավորապես՝ թուրք ազգային փոքրամասնության իրավունքներին վերաբերող դրույթները միտումնավոր խախտելու հարցում։

Ինչպես հայտնում է Anadolu-ն Լոզանի խաղաղության պայմանագրի ստորագրման 99-րդ տարեդարձի կապակցությամբ Էրդողանը  հայտարարել է.

«Թուրքիան, վստահ քայլերով մոտենալով Թուրքիայի Հանրապետության ստեղծման և Լոզանի պայմանագրի ստորագրման 100-ամյակին, որը նշվելու է 2023 թվականին, նույնպես շարունակում է ամրապնդել իր դիրքերը տարածաշրջանային և գլոբալ հարցերում»։

Երկրի ղեկավարը հիշեցրել է, որ Լոզանի խաղաղության պայմանագիրը հնարավորություն է տվել գծելու Թուրքիայի ցամաքային սահմանները, երաշխավորել Հունաստանում թուրք ազգային փոքրամասնության իրավունքները և հաստատել Թուրքիայի ափերի մոտ հունական կղզիների ապառազմականացված կարգավիճակը՝ ընդգծելով, որ  վերջին 99 տարիների ընթացքում Թուրքիան խնամքով կատարել է Լոզանի խաղաղության պայմանագրով ստանձնած պարտավորությունները։

«Սակայն Հունաստանը վերջին շրջանում միտումնավոր խախտում է Լոզանի խաղաղության պայմանագրի դրույթները, մասնավորապես՝ թուրք ազգային փոքրամասնության իրավունքների վերաբերյալ: Թուրքիան չի կարող ընդունել նման իրավիճակը, որը հակասում է բարիդրացիության սկզբունքներին և համաձայնություններին հավատարիմ լինելուն: Անկարան վճռական է բոլոր ջանքերը գործադրել տարածաշրջանում կայուն խաղաղության և կայունության հաստատման, ինչպես նաև թուրք ժողովրդի իրավունքների ապահովման համար»,- ասել է Էրդողանը։