911 փրկարար ծառայությունը հրաժարվել է օգնել վթարված բեռնատարին

Արարատի մարզի Քարքի կոչվող վայրում 14:00-15:00-ն ընկած ժամանակահատվածում վթարի է ենթարկվել «Տրանս Ալյանս» միջազգային ընկերության բեռնատար ավտոմեքենան:

Վթարի պատճառը մերկասառույցն է: Վթարի հետևանքով վնասվել է ավտոմեքենայի բաքը: Տուժածներ բարեբախտաբար չկան:

Ըստ newspress.am-ի տվյալների` վարորդները օգնության համար զանգահարել են 911 փրկարար ծառայություն, որտեղից պատասխան են ստացել, թե ոչնչով չեն կարող օգնել, քանի որ ճանապարհներին մերկասառույց է: Վարորդները խնդրել են, որ գոնե աղ շաղ տան ճանապարհի անցանելիությունը ապահովելու համար, սակայն փրկարար ծառայությունից նշել են, որ աղ շաղ տվող մեքենան տեղում չի և ավելի ուշ կգա, սակայն մինչ այս ժամը մեքենան դեռ չի ժամանել:

Newspress.am-ը այս իրավիճակը պարզաբանելու համար կապ հաստատեց 911 փրկարար ծառայության հետ: Ծառայության աշխատակիցները ասացին, թե նման բան հնարվոր չէ պատահած լինի. «մեր փրկարարները միշտ հասնում են օգնության և հնարավոր չէ, որ արձագանքած չլինեն վթարի ենթարկված վարորդների կանչին»:

Իսկ երբ մենք ներկայացրեցինք կոնկրետ փաստեր 911 ծառայությունից նշեցին, որ կուսումնասիրեն և նոր միայն կպատասխանեն: Ուշագրավ է նաև այն, որ թեև մի քանի վարորդներ զանգահարել էին 911, սակայն ծառայության աշխատակիցները մեզնից էին համարներ խնդրում: