ԼՂՀ-ում «խոզագրիպով» ծանր հիվանդներ չկան

ԼՂՀ առողջապահության նախարարի «Լեռնային Ղարաբաղի Հանրապետությունում սեզոնային գրիպի և սուր շնչառական վարակիչ հիվանդությունների ներկրման և հետագա տարածման կանխարգելման միջոցառումների մասին‰» հրամանի համաձայն շարունակվում է իրականացվել ամենօրյա մշտադիտարկում, կազմակերպվում են համալիր միջոցառումներ բուժսպասարկման բոլոր օղակներում, ինչպես նաև նախադպրոցական և հանրակրթական կազմակերպություններում:
Իրավիճակը լիարժեք վերահսկելու նպատակով ուժեղացվել է նաև հսկողությունը բժշկական հաստատություններում, մասնավորապես հիվանդների ժամանակին հայտնաբերման, արագ և ճիշտ ախտորոշման, հոսպիտալացման գործընթացներում:

Առանձնահատուկ ուշադրություն է դարձվում հիվանդների գրանցման և տեղեկատվությունը օպերատիվորեն առողջապահության նախարարություն հաղորդման վրա: Բժշկական անձնակազմերի զգոնությունը բարձրացնելու նպատակով նախարարության կողմից իրականացվող ստուգումներին զուգահեռ կատարվում են իրազեկման աշխատանք: Բուժհիմնարկներն ապահոված են անհրաժեշտ դեղամիջոցներով, ախտահանիչ նյութերով:

Հիվանդների վաղ հայտնաբերման նպատակով ամբուլատոր ծառայության կողմից իրականացվում են ամենօրյա բակային համայցեր:
Այսօրվա դրությամբ Լեռնային Ղարաբաղի Հանրապետությունում համաճարակաբանական իրավիճակը լարված չէ: 2016թ. հունվարի 13-ի դրությամբ ամբուլատոր և պոլիկլինիկական հաստատություններ դիմելիության աճ չի նկատվում, ստացիոնարում բուժում են ստանում 70 հիվանդ, այդ թվում 33-ը մինչև 18 տարեկան: Բուժում ստացողներից 40 հիվանդի մոտ ախտորոշված է թոքաբորբ, որից 10 -ը մինչև 18 տարեկան:

Շտապ բժշկական օգնության ծառայություններում կանչերի թվերի աճ ևս չի գրանցվել:
Գրիպի Ա տեսակի H1N1 ենթատեսակի լաբորատոր հաստատված դեպքերով 7 հիվանդներից 5-ը դուրս են գրվել առողջացումով: 2 հիվանդ գտնվում են ստացիոնար բուժման մեջ:

Լեռնային Ղարաբաղի Հանրապետության առողջապահության նախարարությունը մեկ անգամ ևս կոչ է անում գրիպանման երևույթների դեպքում ժամանակին դիմել բժշկական օգնության, չզբաղվել ինքնաբուժությամբ, անհարկի չօգտագործել հակաբիոտիկներ, հագնվել եղանակին համահունչ, հնարավորության սահմաններում նվազեցնել շփումները հատկապես գրիպանման երևույթներով հիվանդների հետ, պահպանել հազալու և փռշտալու վարվելակարգը: