«Կանաչող Սևանի» ու ադրբեջանցիներին տված «Սոթքի հանքերի» մասով «ֆաս» հրահանգ չունե՞ք․․․ էս ի՞նչ կեղծ վայնասուն եք բարձրացրել

Էս ի՞նչ վայնասուն եք բարձրացրել, էս ի՞նչ կեղծ օրակարգ եք ձևավորում․․․

Ուրեմն, երկրի կեսը թուրքին տվեցին, մուսուլմաններն եկան քրիստոնյաների հողին տեր դարձան ու դեռ շարունակում են տարածքներ հանձնել՝ ծպտուն չհանեցին, հիմա Հատիսի վրա Հիսուսի արձան տեղադրելու համար բոլորը ձայնները գլուխներն են գցել, թե՝ հարայ-բուդուր, հասեք, սարը տարան․․․ 

Վստահաբար կարող եմ ասել, որ մինչև արձանի տեղադրման վայրի մասին լուրերը, այս վայնասուն բարձրացնողների մեծ մասը, ոչ միայն Հատիսի տեղը չգիտեր, այլև անունն էլ լսած չկար։ Հիմա, երբ փորձում է ինչ-որ մեկը հիշեցնել, որ մենք այսպես-այսպես մի գեղեցիկ լեռ ունենք, ու այն կարող է դառնալ զբոսաշրջության վայր, որը կգրավի շատերի ուշադրությունն ու աշխարհը կիմանա ոչ միայն դրա, այլև հենց Հայաստանի մասին, չգիտես, թե որտեղից, չգիտես, թե ովքեր են հայտնվել ու չգիտես՝ ում հրահանգով, որոշել են բոյկոտել ու կեղծ աղմուկ բարձրացնել։

Ի դեպ, հարկ է նկատել, որ երբ ակտիվիստներն իրենց պաստառներով գնացել են Հատիսը «պաշտանելու և փրկելու»՝ այնտեղ կովեր են եղել․․․ Ասել է թե, Հատիսը կովերի համար արոտավայրի է վերածվել։

Ստացվում է՝ իրականում «լեռնասերներին» պետք է ոչ թե վախեցնի Հիսուսի արձանը, այլ մտահոգի կովերի առկայությունն ու աստիճանաբար Հատիսը մոռացության տալու վտանգը։ 

Հնարավոր է, որ շատերն այս արհեստական աղմուկի հոսքի մեջ են ընկել ինքնաբերաբար ու անգամ գուցե չգիտեն էլ, որ կեղծ աղմուկ բարձրացնողները սնվում են անազնիվ ֆինանսական աղբյուրներից ու ազգակործան կազմակերպություններից։ Բայց պետք է գոնե հասկանան, որ այդ սարի շնորհիվ, որի մասին իրենցից շատերը հենց նոր իմացան, աշխարհը պետք է իմանա Հայաստանի մասին ու գա տեսնելու այն սարը, որն իր վրա կրում է Հիսուսի հսկայական ու տեսարժան արձանը։

Ի վերջո, այս աղմուկ բարձրացնողները նաև կասկածի տակ են դնում նաև մեր հոգևոր արժեքները, մեր հավատքը, որով տարիներ շարունակ հայ ազգը գոյատևել է (Մայր աթոռի ու Ամենայն Հայոց կաթողիկոս Գարեգին Բ-ի նկատմամբ տեղի ունեցող արշավը վկա):

Եթե այդպես չէ, ապա նույն այդ բնասերները ինչո՞ւ այդպես ինտեսիվ ու աղմուկով չեն բարձրաձայնում «կանաչող Սևանի», ադրբեջանցիներին տրված Սոթքի հանքի ու էլի մյուս արժեքավոր տեղանքների մասին։ Թե՞ այդ մասով «ֆաս» հրահանգ չկա․․․

Ինչ վերաբերում է այն խոսակցություններին, թե ինչու է Գագիկ Ծառուկյանը կառուցում այդ արձանը, փոխարենը թող, օրինակ, կոտրված եկեղեցիները վերանորոգեր, ապա հարկ է նկատել, որ նա ոչ միայն վերանորոգել, այլ նաև զրոյից կառուցել է եկեղեցիներ։ Իսկ արձանը կառուցելու համար նախատեսված գումարն էլ իր սեփական միջոցներն են և նա այն տնօրինում է այնպես, ինչպես կամենանա․․

Արմինե Մկրտումյան