Մարգարիտ Եսայանը Էթիկայի պակաս ունի

Իշխանության ներկայացուցչի նկատմամբ բռնություն կիրառելու մեղադրանքով կալանավորված՝ «Նոր Հայաստան» հանրային փրկության անդամ Գեւորգ Սաֆարյանի պաշտպան Տիգրան Հայրապետյանը բողոք է ներկայացրել ՀՀ Վերաքննիչ քրեական դատարան իր պաշտպանյալի նկատմամբ խափանման միջոց ընտրված կալանքի որոշման դեմ։ Օրեր առաջ Գևորգ Սաֆարյանին ազատ արձակելու պահանջ էր ներկայացրել նաև Human Rights Watch միջազգային իրավապաշտպան կազմակերպությունը գլխավոր դատախազին ուղղված նամակում: Գլխավոր դատախազություն էլ իր հերթին նամակը ուղղարկել էր ՀՔԾ:

newspress.am-ի հետ զրույցում իրավապաշտպան Ժաննա Ալեքսանյանը նշեց, որ Գևորգ Սաֆարյանին ազատ են արձակելու, ժամանակի խնդիր է. «Գևորգ Սաֆարյանը անմեղ էր, և ոստիկանների գործողություններն ապօրինի էին: Իշխանությունն էլ պետք է գիտակցի, որ ոստիկանությունն իրեն խայտառակ է պահել»:

Ժաննա Ալեքսանյանի խոսքով՝ անընդունելի է նաև հանրապետական Մարագարիտ Եսայանի հայտարարությունները Human Rights Watch-ի գնահատականների մասով: Վերջինս հորդորել էր միջազգային կառույցին գնահատականներ տալիս չափի մեջ մնալ. «Կարծում եմ, որ էթիկայի, անտեղյակության, ոլորտի չիմացության արդյունք է, հայտարարություն անելուց առաջ լավ կլիներ ծանոթանար բացարձակ հեղինակություն ունեցող միջազգային կազմակերպության պատմությանը»:

Ժաննա Ալեքսանյանը նաև ասաց, որ բարեբախտաբար Մարգարիտ Եսայանը այն անձանցից չէ, կամ նրա մտքերը այնպիսին չեն, որ Հայասատանի սահմաններից դուրս գան: