Որտե՞ղ է Նոր Նորքի թաղապետի 8000 դոլարանոց լուսանկարը

«Իմ աշխատասենյակում ոչ մի նկար չի եղել և ընդհանրապես նման նկար չկա»,-newspress.am-ի հետ զրույցում ասաց Նոր Նորք վարչական շրջանի ղեկավար Արմեն Ուլիխանյանը` անդրադառնալով լրատվական կայքերից մեկում տեղ գտած այն հրապարակմանն, ըստ որի թաղապետը իր լուսանկարի համար վճարել է ութ հազար դոլար:

Հատկանշական է, որ խոսակցության սկզբում Արմեն Ուլիխանյանը ասաց, թե ընդհանրապես տեղյակ չէ, ոչ հրապարակման և ոչ էլ նկարի մասին, սակայն հետո խոստովանեց, որ տեսել է այդ հոդվածը: Հարցին, թե այդ դեպքում ինչո՞ւ զարմացավ, երբ լսեց հոդվածի մասին, պատասխանեց. «Ուղղակի աչքովս է ընկել, մինչև վերջ չեմ կարդացել… բայց դա սուտ է, նման բան չկա: Հիմա եկեք տեսեք, իմ աշխատասենյակում նկարը կախված է, թե ոչ…»:

Նկարը թեև տեղում չէ, սակայն թաղապետի աշխատասենյակը բավականին հարմարավետ է կահավորված:
Թաղապետը չի հիշում, թե ինչ գումարներ է ծախսել այդ հարմարավետության համար, չնայած որ դա այնքան էլ վաղ անցյալում չէր:

«Ընկերներս են օգնել սենյակի կահավորման հարցում, չեմ հիշում, թե ինչքան գումար է ծախսվել»,- ասաց թաղապետը:

Թե ինչ ծառայությունների դիմաց է թաղապետի ընկերական շրջապատը կահավորել նրա սենյակը, վերջինս չմանրամասնեց, սակայն ակնհայտ է, որ նույն ինտնեսիվությամբ թաղապետը իր համայնքում աշխատանքներ չի կատարել:

Համենայնդեպս, քաղաքապետ Տարոն Մարգարյանը դժգոհ է Արմեն Ուլիխանյանի կատարած ընթացիկ աշխատանքից: Այս մասին խոստովանեց, հենց ինքը` թաղապետը:

Արմեն Ուլիխանյանը մեր հետ զրույցում նշեց, որ տարին սկսել է աշխատանքային տրամադրվածությամբ և իրագործելու բավականին ծրագրեր ունի: