«Գլենդել Հիլզը» «թռավ», խաբված և թալանված բնակիչները մնացին «բորդյուրի՞ն»

«Գլենդել Հիլզ» ՓԲԸ-ն սնանկ է ճանաչվել. Երևանի Կենտրոն Նորք-Մարաշ վարչական շրջանների ընդհանուր իրավասության դատարանը բավարարել է «Հայաստանի էլեկտրական ցանցեր» ՓԲԸ-ի դիմումն ընդդեմ «Գլենդել Հիլզ» ՓԲԸ-ի` պատասխանողին սնանկ ճանաչելու պահանջի մասին:

Նշենք, որ դատարանը միանգամից երեք հայց էր քննում ընդդեմ «Գլենդել Հիլզ» ՓԲԸ-ի:

Հիշեցնենք, որ «Գլենդել Հիլզ» ՓԲԸ-ն հիմնադրվել է 2004 թվականին: Ընկերության պաշտոնական կայքը նշում է, որ խոշորագույն կառուցապատող ընկերություններից մեկն է և «Գլենդել Հիլզ»-ը շուրջ 5 տարվա բարեխիղճ և պրոֆեսիոնալ գործունեության արդյունքում կառավարական ու գործարար շրջանակներում ճանաչում ունի:

Նշենք, որ իր գործունեության ընթացքում «Գլենդել Հիլզ»-ը երբևէ չի ունեցել «բարեխիղճ և պրոֆեսիոնալ» ընկերության համբավ:

«Գլենդել Հիլզը»-ի զոհերից է աղետի գոտին, որտեղ անգամ նախագահ Սերժ Սարգսյանն էր նկատել անորակ ու կիսատ-պռատ աշխատանքները ևհանձնարարել էր արդեն շահագործման հանձնվող շենքերի թերությունները վերացնել: Բացի անորակ աշխատանքներից, շենքերում լուծված չէին ջեռուցման, գազիֆիկացման, սալիկապատման և սալօջախների տեղադրման հարցերը: Ընկերությունը ստիպված էր քանդել մոտ 30 հազար քմ գաջած պատերը և նորից գաջել: Նույն խնդիրն էր նաև Սպիտակում, որտեղ ընկերությունը շահագործման պիտի հանձներ 300 բնակարան, սակայն պարզվել է, որ շենքերի վերջին հարկերի առաստաղները կառուցվել են պենոպլաստից: Շատերին զարմացրել էր ոչ թե այն, որ առաստաղը պենոպլաստից է, այլ թե ինչպես են շինարարները հաջողել դրանք տանիք բարձրացնել:

«Գլենդել Հիլզը» խոստացել էր 2014թ-ին Սպիտակի տարածաշրջանի գյուղերում շահագործման հանձնել 255 տուն, սակայն մարդիկ այդպես էլ մնացին անտուն:

2004 թ.-ից Կառավարության տարբեր որոշումներում կարելի է հանդիպել «Գլենդել Հիլզի» ընկերությանը, որտեղ կառավարությունը գումարներ է հատկացրել շինարարական աշխատանքների համար:

Նշենք, որ հենց 2000-ականներից սկսվեց Երևանի կենտրոնի պատմամշակութային շենքերի քանդումը, շրջանառության մեջ մտավ «իրացման գոտի» անվանումը, որը ցանկացած կենտրոնի բնակչի մոտ անտունի ասոցիացիաներ է առաջացնում:

«Մեր ընկերության գլխավոր նպատակն է ապահովել հաճախորդների գումարների անվտանգությունը՝ որպես անշարժ գույքի կապիտալի ներդրում»,-ասվում է ընկերության պաշտոնական կայքում:

«Գլենդել Հիլզից» խաբված հարյուրավոր քաղաքացիներ ձևավորել են նախաձեռնող խումբ` իրենց խնդիրները լուծելու համար:

«Գլենդել Հիլզի» հետ գործ բռնած ընտանիքներից որոշներին բնակարանների վկայականները չեն հանձնվում, մյուսներից նախնական պայմանավորվածությունից ավել գումար են ուզում, որոշների շենքերն էլ անգամ կառուցված չեն, բայց բնակիչներին ստիպում են վճարել և բանկերի գումարը, և «Գլենդել Հիլզի» ստանձնած տոկոսները:

Անգամ ընկերությունից հայտնել են, որ իրացման գոտու բնակիչների նկատմամբ որեւէ պարտավորություն չունեն:

«Գլենդել Հիլզ» ՓԲԸ-ն ոչ ուղղակիորեն, ոչ անուղղակիորեն Ֆիրդուսի տարածքի իրացման գոտու բնակիչների գույքի փոխհատուցման հետ կապված որեւէ պարտավորություն չունի»: Սրանք այն բնակիչներն են, ովքեր ամեն հինգշաբթի կառավարության շենքի մոտ բողոքի ակցիաներ են անում: Նրանց ժամանակին խոստումներ է տվել թե Տիգրան Սարգսյանը, թե Հովիկ Աբրահամյանը:

«Գլենդել Հիլզ»-ն ակտիվ մասնակցություն է ցուցաբերում հանրապետության քաղաքաշինական և բարեկարգման ծրագրերին, ինչպես նաև իրականացնում է պետական և սոցիալական նշանակության մի քանի խոշոր ծրագրեր»,- ասվում է կայքում և սա ճշմարտություններից մեկն է, քանի որ որտեղ պետական շինարարություն կա «Գլենդել Հիլզ»-ն այնտեղ է: Եվ այս ընկերությանն է կառավարությունը խոշոր գումարներ տրամադրում` կիսատ-պռատ կառուցելու, անտուն գյումրեցիներին և այլոց խաբելու համար:

Ըստ շրջանառվող տեղեկությունների, ընկերության սեփականատերերից մեկը սփյուռքահայ Վահե Յաղուբյանն է, ինչպես նաև ԱԺ պատգամավոր Դավիթ Հարությունյանը: Շրջանառվում էր նաև ՀՀ նախագահի եղբայր Սաշիկ Սարգսյանի անունը:

Անգամ պետռեգիստրի կայքում մեր փնտրտուքը արդյունք չտվեց`«Գլենդել Հիլզ» անվանումով ընկերություն  գրանցված չկար: Ահա թե ինչու աշխատակիցները տեղյակ չեն, թե ով է ընկերության իրական սեփականատերը: