Եթե դրսում մեզ անվանում եք փախստականներ, ապա ի՞նչն է ձեզ խանգարում մեզ այդ կարգավիճակը տալ. հադրութցին՝ ՀՀ կառավարությանը

Ես չեմ հասկանում Հադրութից, գյուղերից, քաղաքից տեղահանված մարդկանց հարցեր, ես հասկանում եմ հայ ազգի հարցեր։ Եվ, վերջ ի վերջո, Հադրութին խփելով՝ միայն հարդրութեցուն չեն վնասել։ Այս մասին կառավարության դիմաց, բողոքի ակցիայի ժամանակ ասաց «Հանուն Հադրութի» հասարակական կազմակերպության նախագահ Լևոն Հայրյանը։

Հայրյանի խոսքով՝ ինքը չի հասկանում, թե մարդիկ ինչ են մտածում ասելով՝ «ձերն» ու «մերը»։

«Հայաստանի տարածքային ամբողջականություն ասելով՝ ես հասկանում եմ ոչ թե Մեղրին, Գորիսը, Կապանը, Սիսիանը, այլ Հադրութը։ Եթե չվերականգնվի, ապա հայ ազգը պետք է իր ապագայի մասին մտածի։ Մեր հարցերը թողնում ենք ուրիշներին լուծելու, ոչ մի քայլ չենք անում։ Բայց միշտ ասում են՝ մենք գործ ենք անում, բայց դուք չեք տեսնում։ Ես չեմ հավատում։ Գործը, որ անում են՝ մի տեղ երևում է։ Մեր հարցերից է հադրութահայությանը վերադարձնելը միջազգային ու խաղաղապահ ուժերի հսկողության տակ։ Ուզում է լինի՝ ռուսը, ամերիկացին կամ նեգր։ Միայն թե մեր անվտանգությունն ապահովի»,- նշեց Հայրյանը։

Վերջինս նշեց ևս մեկ կարևոր հարց, այն է՝ իրենց կարգավիճակի հարցը, որը, նրա խոսքով, տարբեր ձևերով ուզում են լղոզել։ 

«Իրենք մեզ ասում են ներքին տեղահանվածներ: Այսինքն՝ Հադրութը Հայաստանի մա՞ս է: Եթե այո, ապա ՀՀ-ն թող հայտարարի, որ Հադրութը Հայաստանի մաս է, թեկուզ օկուպացված, կամ հայտարարի, որ Արցախն անկախ է: Չէ՞ որ մեզ ինքնաթիռներով կամ գնացքներով չեն բերել։ Մենք հրետակոծության պատճառով ենք դուրս եկել։ Կարծում եմ, որ մեզ փախստականի կարգավիճակ տալու համար որևէ խնդիր չկա։ Ապօրինի կերպով Հադրութը կարողացան տալ, բայց չեն կարողանում համայնքին փախստականի կարգավիճակ տալ։ Չգիտես ինչու՝ դժվար է։ Բայց երբ իշխանությունները հանդիպում են միջազգային կառույցների հետ, մեզ անվանում են փախստականներ: Եթե դրսում մեզ անվանում եք փախստականներ, ապա ի՞նչն է իրենց խանգարում օրենք ընդունել փախստականների մասին»,- նշեց Հայրյանը։