Հովիկ Աբրահամյանը էլի՞ «մատ թափ կտա» Արմավիրի մարզպետի վրա

Վերջին ժամանակահատվածում ակտիվորեն խոսվում է կառավարության կազմում փոփոխությունների մասին: Բայց մի շարք նախարարներ և մարզպետներ բացահայտ իրենց անհանգստությունը ցույց չեն տալիս:

Նախօրեին Սյունիքի, Արագածոտնի, Գեղարքունիքի մարզպետները newspress.am-ի հետ զրույցում իրենց պաշտոնանկության մասին խոսակացությունները անլուրջ համարեցին: Մի շարք մարզպետներ էլ այս օրերին նախըտնրում են չպատասխանել հեռախոսազանգերին, կամ անջատում են հեռախոսը: Արմավիրի մարզպետ Աշոտ Ղահրամանյանի հետ ևս մեզ կապ հաստատել չհաջողեց: Ի դեպ մամուլում, այսօր արդեն շրջանառվեց, որ Աշոտ Ղահրամանյանը Սուրբ ծնունդը նշանավորել է աշխատակազմին ուղղված խոսքով։ Ղահրամանյանն անտրամադիր ու նյարդային տեսքով ներկայացել է մարզպետարան եւ հայտնել, որ «գնում է վաստակած հանգստի»։

newspress.am-ի հետ զրույցում Արմավիրի մարզպետի տեղակալ և հասարակայնության հետ կապերի բաժնի պետ` Հերմինե Վարդանյանն ասաց, որ մարզպետը հունվարի ութից բնականոն աշխատում է:

«Մարզետի հրաժարականի, պաշտոնանկության մասին լուրերը իրականությանը չեն համապատասխանում»,-մանրամասնեց նա:

Հերմինե Վարդանյանի խոսքով՝ Աշոտ Ղահրամանյանը անտրամադիր չէ, լծված է օրվա աշխատանքով:

«Մամուլում գրվածը հերթական հերյուրանք է»,- եզրափակեց նա:

Հիշեցնենք նաև, որ Հովիկ Աբրահամյանը մարզպետների հետ առանձին հանդիպումների ժամանակ մատ է թափ տվել Աշոտ Ղահրամյանի վրա: Ընդ որում եղել են դեպքեր, երբ նույնիսկ լրատվամիջոցների ներկայությամբ դիտողություններ է արել մարզպետին: Հովիկ Աբրահամյանի վարչապետության օրոք նկատելի է, որ Արմավիրի մարզպետ Ղահրամանյանը չի դասվում Հովիկ Աբրահամյանի «սիրելիների» շարքին: