Ձեր ներկայությունը մեզ բոլորիս հույս է ներշնչում, որ դեռ կարելի է փրկել Սյունիքը, ես քո ցավը տանեմ, ուժեղ մարդ. Մանվել Փարամազյանը՝ ընդամենը 1 տարի առաջ (արխիվային տեսանյութ)

Քաջարանի քաղաքապետ Մանվել Փարամազյանը երեկ համացանցի հակահերոսն էր. մարդ, ով քաղաքական հայացքների պատճառով, բայց այլ փաթեթավորումներով քրեական գործով ամիսներ շարունակ պահվում էր կալանքի տակ, այսօր ազատության մեջ է: Եվ, պարզվեց, փաստորեն, որ այդ ազատության համար նա կոնկրետ մարդու է պարտական, և դա, ասենք, նրա փաստաբանները չեն, ոչ էլ դատավորը, այլ նա, ով այս երկրում որոշում է բոլոր ու բոլորի հարցերը: 

Նախկինում քաղհալածյալ ներկայացող Փարամազյանը բացահայտեց, թե ում է պարտական հիմա. կարմիր վարդեր, գոհունակ ժպիտ ու խոնարհված գլուխ: Վերջ: Այսքանը բավարար է՝ այնքան բաղձալի արևի լույսն առանց ճաղերի տեսնելու համար: 

«Էրատո» ջոկատի «հրամանատարուհու» առաջ խոնարհվածի համար ամաչում են նույնիսկ իր՝ արդեն նախկին կուսակից ու գոնե նախկինում իրենց գաղափարակից համարած գործիչները: Հասկանալի է, թե ընդդիմադիր գործիչների համար որքան ամոթալի է, որ իրենց պայքարի ընկերը գնում ու ծաղիկներ է խոնարհում հենց իրենց կողմից «դավաճան», «կապիտուլյանտ», «մարդասպան», «հողատու», «ազգակործան պատուհաս» որակված Փաշինյանի կնոջ առաջ: 

Բայց սա չէ մեր հիմնական ասելիքը: Ընթերցողին ենք ներկայացնում ընդամենը մեկ տարի առաջ Քաջարանում «Հայաստան» դաշինքի նախընտրական քարոզարշավի ժամանակ Մանվել Փարամազյանի «սրտի խոսքը»՝ ուղղված ընդդիմության այնժամանակվա հիմնական թեկնածու Ռոբերտ Քոչարյանին: Մեջբերենք այն բառացի.

«Պարոն նախագահ, բարով եք եկել: Անկեղծ ասած՝ Ձեր նեկայությունը մեզ բոլորիս հույս է ներշնչում, որ դեռ կարելի է փրկել Սյունիքը: Առաջնորդեք մեզ դեպի հաղթանակ, պարոն Նախագահ, Քաջարանը Ձեր հետ է, ես քո ցավը տանեմ, ուժեղ մարդ»: 

Իշխանությունից դժգոհ ցանկացած քաղաքացու համար Փարամազյանի այս խոսքերը պարզապես սարսռեցնող են, և սա ընդդիմության թեև փոքր, բայց պարտությունն է՝ այն առումով, որ իրենց շարքեր են ընդունում մարդկանց, ովքեր իրենց հետ են այնքան ժամանակ, որքան ձիու վրա են, երբ ընկնում են, սկսվում է առնետավազքը: 2021-ի ընտրություններին ընդառաջ, համենայն դեպս ընդդիմությանը (այն ժամանակ՝ նաև Փարամազյանին) հաղթանակը խիստ մոտ էր թվում: 

NEWSPRESS.am