«Կերպարը ես խաղում եմ, իսկ կյանքում առանձին մարդ եմ»․ սիրված դերասան Արթուր Հակոբյանը 60 տարեկան է (լուսանկարներ, տեսանյութ)

Այսօր սիրված դերասան Արթուր Հակոբյանի ծննդյան օրն է։

Դերասանաին շատերը հիշում են հայտնի «Վերվարածները» հեռուստասերիալից, որտեղ Արթուր Հակոբյանը մարմնավորում է  Արբի քեռուն։

Կենսագրական տվյալներ

Արթուր Հակոբյանը ծնվել է 1962 թվականի հուլիսի 8-ին Գյումրի քաղաքում։ Սովորել է Եղիշե Չարենցի անվան միջնակարգ դպրոցում, որն ավարտել է 1979 թվականին։ Ուսումը շարունակել է Գյումրու Վ․ Աճեմյանի անվան դրամատիկական թատրոնին կից դերասանական ստուդիայում, այնուհետև աշխատել է այդ թատրոնում։ 1989 թվականին ավարտել է Երևանի գեղարվեստի ինստիտուտի դերասանական ֆակուլտետը։

Արթուր Հակոբյանի ընտանիքում բոլորը սիրել են արվեստը, սակայն հայրն ի սկզբանե դեմ էր դերասան դառնալու նրա որոշմանը։ Նա ոչ մի անգամ չի գնացել որդուն բեմում տեսնելու՝ ասելով՝ «Դու ի՞նչ դերասան, դերասան կոչվելու իրավունք ունեն Վահրամ Փափազյանը, Հրաչյա Ներսիսյանը, Ֆրունզե Մկրտչյանը․․․»

Ավելի ուշ Արթուրի մայրը սկսել է աշխատել թատրոնում, և նա ևս ընդունվել է աշխատանքի՝ որպես բեմի բանվոր, քանի որ, ինչպես ինքն է ասում։

Գործունեություն

Արթուր Հակոբյանը խաղացել է Հակոբ Պարոնյանի անվան պետական երաժշտական կոմեդիայի թատրոնում, Երևանի Մհեր Մկրտչյան արտիստական թատրոնում և Պատանի հանդիսատեսի թատրոնում։ Աշխատել է նաև մի քանի հեռուստաընկերությունների հետ, այդ թվում՝ Շանթ ՀԸ, Արմենիա TV, Հայաստանի hանրային hեռուստաընկերություն, Հայկական երկրորդ հեռուստաալիք։

Հյուրախաղերով հանդես է եկել ԱՄՆ-ում, Բելգիայում, Նիդերլանդներում, Ռուսաստանում։

Դերասանը կերտել է բազմաթիվ դերեր․ Ր․ Շարտի «Կնոջս անունը Մորիս է» ստեղծագործությունում հանդես է եկել Ժորժի կերպարով, Խ․ Դաշտենցի «Ֆայտոն Ալեքը» աշխատանքում՝ գյուղացի հավավաճառի կերպարով, Լևոն Շանթի «Կայսրը» ստեղծագործությունում՝ Վասիլի կերպարով, Հ․ Թումանյանի «Տերն ու ծառան» աշխատանքում՝ Սարոյի կերպարով և այլն։ Նկարահանվել է հեռուստասերիալներում, տարբեր նախագծերում և ֆիլմերում՝ «Տաքսի Նեմա», «Մեր գյուղը», «Մի կաթիլ մեղրը», «Նախաճաշ երկուսի համար», «Վերվարածներն ընտանիքում» և այլն․․․

Ֆեյսբուքյան իր էջում հիշատակելով ծննդյան օրվա մասին, Արթուր Հակոբյանը գրել է․

Արդեն վաթսո՞ւն

Էդ երբ անցավ էդպես վռազ,

Ապրել եմ էլի մեկից ավել, մեկից պակաս։

Չեմ հավատում ... Արդեն վաթսուն...

Մի քիչ հարցեր ունեմ Աստծուն

Տո դու ով ես,որ հարցեր տաս

Ապրել ես էլի, մեկից ավել մեկից պակաս...

Մի առիթով դերասանին հարցրել են՝ միշտ ծիծաղկոտ, հումորային ու ուրախ դերեր է խաղում, իրականում արդյոք նա այդպիսի՞ն է։ Վերջինս արձագանքել է․ «Ես զարմանում եմ այն դերասանների վրա, որոնք ինչպես էկրանին են, նույն կերպ կյանքում են։ Կերպարը ես խաղում եմ, իսկ կյանքում ես առանձին մարդ եմ»։

 Նա նաև ասել է, որ ցանկաում է « որևէ տրագիկոմեդիայում խաղալ»․․․

NEWSPRESS.am-ի անձնակազմը շնորհավորում է սիրված դերասանին՝ ծննդյան օրվա առիթով ու մաղթում նրան քաջառողջություն, հաջողություններ, ինչպես ընտանիքում, այնպես էլ բեմում․․․ և իհարկե՛, թող իրականանա Արթուր Հակոբյանի ցանկությունն ու նա հանդես գա նոր դերով․․․

Ներկայացնում ենք նաև Արթուր Հակոբյանի  հետ արված հարցազրույցներից մեկը, որտեղ նա անդրադարձել է նաև ներքաղաքական ու սահմանային իրավիճակին։