Աննա Հակոբյանին ջերմորեն ընդունել է նաև ընդդիմադիր «Առուշանյան» դաշինքի ավագանու անդամը

Hraparak.am-ը գրում է․

Երեկվանից Նիկոլ Փաշինյանի տիկին Աննա Հակոբյանը Սյունիքի մարզում է։ Մենք արդեն գրել ենք, որ նա այնտեղ է շրջագայելու, հանգստանալու նպատակով, եւ գիշերել է Հալիձորի Հարսնաձոր հյուրանոցային համալիրում։ Մեր տեղեկություններով, նա այսօր ևս պատրաստվում է գիշերել Սյունիքում, քանի որ հանգստին զուգահեռ մի քանի մասնավոր այցեր է պլանավորել:

Այսօր Աննա Հակոբյանը այցելել էր Քաջարան համայնք, որտեղ նրան դիմավորել էր համայնքի ղեկավար Մանվել Փարազամյանը և վարչապետի տիկնոջը ուղեկցել Հայրենական մեծ պատերազմի մասնակից, 100-ամյա Արշալույս Թադևոսյանի տուն։ Սա հետաքրքիր էր նրանով, որ Քաջարանի համայնքապետ Մանվել Փարամազյանը Սյունիքի այն քաղաքապետերից է, ովքեր քաղաքական ենթատեքստով քրեական գործերով ամիսներ շարունակ գտնվել են կալանքի տակ, իսկ Փարամազյանի գործով դեռ դատավճիռ չկա։ Ստացվում է, որ Սյունիքի ըմբոստ համայնքապետերից մեկը որոշել է առաջին տիկնոջը ծաղկեփնջով դիմավորել:

Վարչապետի տիկինը Սյունիք կատարած այցի շրջանակներում այցելել է նաև Վերիշեն գյուղական բնակավայրում գտնվող կանանց զարգացման «Ռեսուրս կենտրոն» հիմնադրամ: Կենտրոնում տիկնոջը ջերմորեն դիմավորել և տեղում կատարվող աշխատանքներին ծանոթացրել է կենտրոնի գործադիր տնօրեն Ռուզաննա Տոռոզյանը։ Վարչապետի տիկնոջ այս այցն ու ընդունելությունն էլ ուշագրավ է, քանի որ Ռուզաննա Տոռոզյանը ընդդիմադիր «Առուշանյան դաշինք»-ով ընտրված Գորիսի ավագանու անդամ է:

Մեզ հետ զրույցում սյունեցիներից ոմանք կարծիք հայտնեցին, թե տպավորություն է, որ Աննա Հակոբյանի այցը Սյունիք մեսիջ է՝ սյունեցիներին հասկացնելու՝ այլևս ընդդիմացող եւ վարչակազմի դեմ ընդվզող համայնքապետ չկա, եւ «Դիմադրություն» շարժման տապալումից հետո յուրաքանչյուրն իր մասին է մտածում: