ՀՀԿ ներսում նոր տարաձայնություններ են սկսվել. «ՉԻ»

«Չորրորդ իշխանություն» թերթը գրում է. «Լավատեղյակ աղբյուրներից «ՉԻ»-ին հայտնի դարձավ, որ ՀՀԿ ներսում նոր տարաձայնություններ են սկսվել: Իսկ պատճառը եղել է այն, թե ով պետք է հեղինակի սահմանադրական փոփոխություններից հետո ընդունվելիք Ընտրական նոր օրենսգիրքը:

Բանն այն է, որ ԸՕ-ն պետք է զրոյից գրվի, քանի որ նոր սահմանադրությամբ նախատեսված է անցում 100 տոկոս համամասնական ընտրակարգի:

Եվ ահա, ԱԺ ՀՀԿ-ական պատգամավորների մի մասը չի ցանկացել համակերպվել այն մտքի հետ, որ ԸՕ-ն գրելու են ոչ թե իրենք՝ պատգամավորները, ՀՅԴ ու ԲՀԿ իրենց գործընկերների հետ միասին, այլ նոր Սահմանադրության հեղինակները՝ Դավիթ Հարությունյանը, Վարդան Պողոսյանն ու Հրայր Թովմասյանը:

Ընդ որում, ՀՀԿ-ականներին այս հարցում «դուխ տվողները» հենց ՀՅԴ-ից ու ԲՀԿ-ից են եղել, ու ՀՀԿ-ականները կուսակցության ներսում ակնարկել են, որ ԱԺ-ից օրենսդիր ֆունկցիան, ըստ էության, վերցրել են՝ թողնելով միայն կոճակ սեղմելու առաքելությունը:
Այնուամենայնիվ, վերջում որոշում է կայացվել՝ սահմանադրության հեղինակների մի մասը կհեղինակի նաեւ ԸՕ-ն, բայց պատգամավորների հետ միասին, նրանց առաջարկները հաշվի առնելով:

Նկատենք, որ նոր ԸՕ-ն հեշտ չէ գրել, թեկուզ այն պատճառով, որ իշխանությունները խնդիր ունեն մի կերպ այն տեղ ամրագրել կայուն մեծամասնության եւ երկրորդ փուլի անցկացման հարցը, ինչին ՀՅԴ-ն ու ԲՀԿ-ն կողմ չեն՝ գոնե այս պահին»:

Առավել մանրամասն՝ թերթի այսօրվա համարում