Լիարժեք կատարվել է պետական սահմանի պահպանությունը

Հունվարի 12-ին ՀՀ պաշտպանության նախարար Սեյրան Օհանյանը եւ ՀՀ ԶՈՒ ԳՇ պետ, գեներալ-գնդապետ Յուրի Խաչատուրովը մասնակցել են երկրորդ եւ երրորդ բանակային զորամիավորումների 2015 թվականի ուսումնական տարվա արդյունքների ամփոփմանը նվիրված ռազմական խորհրդի նիստերին:

Ռազմական խորհրդի նիստերի ընթացքում ուսումնական տարվա լավագույն արդյունքներ ցուցաբերած զինվորական ստորաբաժանումներին հանձնվել են պատվո դրոշներ:

Հաշվետու զեկույցներով հանդես են եկել բանակային զորամիավորումների հրամանատարներն ու նրանց տեղակալները: Վերլուծվել են անցկացված մարտական եւ զորահավաքային պատրաստականության, օպերատիվ եւ շտաբային պատրաստության, զինվորական կարգապահության ամրապնդման, մարտական հերթապահության կրման պայմանների եւ թիկունքային ապահովման հարցերի կատարելագործմանն ուղղված միջոցառումների արդյունքները:

Ընդգծվել է, որ առավել բարձրացվել է զորքերի մարտական պատրաստության եւ առաջադրված մարտական խնդիրներին օպերատիվորեն արձագանքելու, զինծառայողների ինքնուրույնության ու նախաձեռնողականության աստիճանը, լուրջ ուշադրություն է դարձվել հատկապես առաջնագծում տարվող աշխատանքների կատարելագործմանը: Ձեռք են բերվել ժամանակակից հեռահար, ճշգրիտ միջոցներ, լրակահավորվել եւ տարբեր միջոցներով հագեցվել են մարտական հենակետերը, ինժերենական ամրաշինական կառույցներն ու արգելափակոցները: Շահագործման են հանձնվել ռազմական նշանակության մի շարք նոր օբյեկտներ, թարմացվել է զորամասերի ուսումնանյութական բազան: Հրամանատարի եւ զինվորի ճիշտ փոխգործակցության, նոր մարտավարական ձեւերի կիրառման շնորհիվ նշյալ միջոցառումները թույլ են տվել վերահսկելու հակառակորդի շարժը, դիմագրավելու յուրաքանչյոր ոտնձգության՝ անհրաժեշտության դեպքում իրականացնելով պատժիչ գործողություններ, լիարժեք կերպով կատարվել է պետական սահմանի պահպանության խնդիրը:

«Փառք ու պատիվ ամեն օր խաղաղություն պարտադրող հայ զինվորին ու սպային եւ ակնածանքով խոնարհում զոհված զինծառայողների հիշատակի առջեւ»,- ամփոփելով ռազմական խորհրդի նիստերը` երախտիքի այս խոսքերով է իր եզրափակիչ խոսքը սկսել ՀՀ պաշտպանության նախարար Սեյրան Օհանյանը: Արձանագրված հաջողությունների խորապատկերում բարձր գնահատելով ազգային բանակի յուրաքանչյուր օղակի դերն ու նշանակությունը` Սեյրան Օհանյանը անդրադարձ է կատարել առկա որոշակի բացթողումներին, դրանք վերացնելու հիմնական միջոցառումներին ու աշխատանքային ուղղություններին:

Պաշտպանական գերատեսչության ղեկավարը վստահություն է հայտնել, որ 2016 ուսումնական տարում զինված ուժերը հավատարիմ են մնալու ամենօրյա զարգացման եւ շարունակական առաջընթացի սկզբունքներին` տարվա ընթացքում ղեկավարվելով «Պատրաստված հրամանատար, արհեստավարժ բանակ, ապահով հայրենիք» կարգախոսով:

Շնորհակալություն հայտնելով լարված, քրտնաջան աշխատանքի եւ բարեխիղճ ծառաության համար` ՀՀ ԶՈՒ ԳՇ պետ, գեներալ-գնդապետ Յուրի Խաչատուրովն իր հերթին նկատել է, որ աշխարհում ստեղծված ռազմաքաղաքական անկանխատեսելի իրադրության պայմաններում տարեցտարի ավելի է բարձրանում զինված ուժերի դերն ու նշանակությունը, առավել համախմբված ու համարձակ գործելու անհրաժեշտությունը, հորդորել է նոր ուսումնական տարում եւս ջանք ու եռանդ չխնայել առկա հաջողությունները բազմապատկելու համար: