Հայաստանը 2022-ին արդեն ավելի քան 300 մլն դոլար արտաքին պարտք է ավելացրել՝ դրա մեծ մասն օգտագործելով ասֆալտապատման վրա․ Հոխիկյան

Ստացվում է, ՀՀ իշխանությունը ոչ թե արդյունավետ կառավարման շնորհիվ կարողանում է միջոցներ տնտեսել ու դրանք ուղղել ասֆալտապատմանը, այլ պարտք է վերցնում ու գործ անում՝ հանրության աչք խաբելու համար։ Այդ մասին գրել է հեռուստամեկնաբան Նաիրի Հոխիկյանը՝ նշելով, որ 2022թ․ Հայաստանն արդեն ավելի քան 300 մլն դոլար արտաքին պարտք է ավելացրել, որի մեծագույն մասն օգտագործելով հենց նման ծախսերի վրա։

«Հայաստանում լայն թափով ընթանում են ասֆալտապատման աշխատանքներ, հիմնականում մայրուղիներին ու շատ երթևեկելի գոտիներում։ Լավ է, ինչ խոսք։ Որակյալ ճանապարհը կարևոր է ինչպես տնտեսական, այնպես էլ ռազմական նպատակներով։

Մյուս կողմից, երբ ուսումնասիրում ես, թե որտեղից են գոյանում այդքան լայնածավալ աշխատանքների գումարները, հասկանում ես, որ ամեն ինչ չէ տվյալ դեպքում շատ լավ։

Հայաստանը 2022-ին արդեն ավելի քան 300 մլն դոլար արտաքին պարտք է ավելացրել՝ դրա մեծագույն մասը օգտագործելով հենց նման ծախսերի վրա։ Ստացվում է, ՀՀ իշխանությունը ոչ թե արդյունավետ կառավարման շնորհիվ կարողանում է միջոցներ տնտեսել ու դրանք ուղղել ասֆալտապատմանը, այլ պարտք է վերցնում ու գործ անում՝ հանրության աչք խաբելու համար։

Եթե ավելի քան 9 մլրդ $ արտաքին պարտքը բաժանենք ՀՀ քաղաքացիների վրա, ապա կստացվի, որ այս պահին յուրաքանչյուրն արդեն ունի գրեթե 4000$ պարտքի բաժին։ Եվ որքան շատ մարդ է արտագաղթում Հայաստանից, այնքան ավելանում է այստեղ մնացողների պարտքի բաժինը։

Այդ թիվը ավելանում է մեծ արագությամբ, ու Աստված գիտի, թե իշխանության ավարտին Նիկոլ Փաշինյանը ինչ է մեզ թողնելու»։