Մինչև այս պահն առանձնապես մեծ առաջընթաց չկա, և դա տեսանելի է․ Ռուբինյանը՝ հայ-թուրքական հարաբերությունների կարգավորման մասին

Հայ-թուրքական հարաբերությունների կարգավորման գործընթացի մեկնարկից ի վեր Հայաստանը շատ կառուցողական է եղել: Հայաստանն ունի քաղաքական կամք և ցուցադրել է այդ քաղաքական կամը՝ արագ կարգավորման հասնելու և գործընթացի հաջողությունը կախված է Թուրքիայի համապատասխան կառուցողականությունից և քաղաքական կամքից։ Այս մասին Ազգային ժողովում լրագրողների հետ ճեպազրույցի ժամանակ ասաց ԱԺ փոխնախագահ, Հայաստան-Թուրքիա հարաբերությունների կարգավորման գործընթացում ՀՀ հատուկ ներկայացուցիչ Ռուբեն Ռուբինյանը։

Ռուբինյանի խոսքով՝ ինչպես տեսնում ենք, մինչև այս պահն առանձնապես մեծ առաջընթաց չկա, և դա տեսանելի է։ Անդրադառնալով սահմանային վերասահմանազատման հարցին՝ ԱԺ փոխնախագահը նշեց, որ նման հարց քննարկումների չկա։ 

«Մեր տրամաբանությունը հետևյալն է, որ ամենակարևորը քաղաքական կամքն է, եթե այն կա, ապա հանդիպման վայրը դառնում է զուտ տեխնիկական հարց։ Բացի այս, Թուրքիայի կողմից հնչեցված առաջարկն այն ժամանակ՝ հանդիպումն անցկացնել Երևանում, ենթադրում է, որ մեր թուրք գործընկերները գործընթացը տեսնում են, կամ ուզում են տեսնել որպես իրապես երկկողմ գործընթաց: Բայց այդ համատեքստում մի փոքր տարօրինակ են Թուրքիայի տարբեր պաշտոնյաների կողմից հնչող հայտարարություններն առ այն, որ իրենք գործընթացը կոորդինացնում են կամ համաձայնեցնում են Ադրբեջանի հետ: Բայց կրկնում եմ, այս գործընթացներում ամենակարևրը քաղաքական կամքն է, եթե այդ կամքը կա, մնացածը շատ հեշտ լուծվող հարցեր են»,- նշեց Ռուբինյանը։