Գագիկ Բեգլարյանի մերձավորը կրկնակի կեղծարար է

Սահմանադրական հանրաքվեի ամենաաղմկահարույց ընտրակեղծարարը ՀՀ կապի և տրանսպորտի նախարար Գագիկ Բեգլարյանի մերձավոր Զավեն Միրիջանյանն էր, ում նկատմամբ քրեական գործ է հարուցվել:

Առաջին դատական նիստի ժամանակ մեղադրող դատախազը, հաշվի առնելով գործում առկա մի շարք մեղմացուցիչ հանգամանքներ, այդ թվում՝ Զավեն Միրիջանյանի առողջական վիճակն ու խնամքին առկա անչափահաս երեխաների առկայությունը, նրա համար պահանջեց 3 տարի և միջնորդեց պատիժը պայմանականորեն չկիրառել։

Թե որքանով է իրավական ընտրախախտում իրականացրած անձի նկատմամբ նման մեղմացուցիչ հանգամանքների կիրառումը, փորձեցինք պարզել Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցից:

«Նույն անձնավորությունն արդեն երկրորդ անգամ է ընտրակաշառք առաջարկելու մեղադրանքով կանգնում դատարանի առաջ»,- newspress.am-ի հետ հարցազրույցում ասաց Սաքունցը:

Նրա խոսքով 2008թ-ի նախագահական ընտրությունների ժամանակ Զավեն Միրիջանյանը դարձյալ ընտրախախտումներ է կատարել և հայտնվել ընտակեղծարարների ցանկում:

Արթուր Սաքունցի դիտարկմամբ մեղմացուցիչ հանգամանքների մասով դատախազի միջնորդությունը թերևս առաջին հայացքից կարելի է իրավական համարել, սակայն, մյուս կողմից էլ, անպատժելիության գաղափարը թույլ է տվել այդ մարդուն կրկնել միևնույն հանցանքը:

«Նույն գործողությունը կատարել է մի քանի անգամ, սա նշանակում է, որ նա հրաման է կատարել: Եվ այստեղ կարևոր է նաև, թե ում հրահանգով է նա կատարել դա: Ընդամենը մեկ-երկու էպիզոդով փորձում են աչք փակել, և համոզել, որ ընտրախախտումներ կատարողները պատժվում են: Սակայն դա տեղային և մասնավոր բնույթ է կրում»,-ասաց Սաքունցը:

Արթուր Սաքունցի համար անակնկալ չէր և նա չի զարմանում, որ Միրիջանյանի նկատմամբ կկիառվի մեղմ պատիժ, քանի որ նա Գագիկ Բեգլարյանի մերձավորն է: Նրա խոսքով`ընտրախախտումներ կատարողները հենց պաշտոնյաների մտերիմներն ու հարազատներն են:

«Կեղծիքներ կատարողների նկատմամբ միշտ մեղմ են վերաբերվում, երբ յուրայիններն են դրանք կատարում, ավելի խիստ կլինեին, եթե ընդդիմության ներկայացուցիչներն անեին: Դա անակնկալ չէր. էդպես էլ պետք է լիներ»,- նկատեց ՀՔԱՎ ղեկավարը:

Նա հավելեց նաև, որ սա այն եզակի դեպքերից է, երբ հաջողվել է ձայնագրել և ձեռքի տակ ընտրախախտման փաստ ունենալ:

Հիշեցնենք, որ հանրաքվեից առաջ Միրիջանյանը հանդիպել է ՀԱԿ ներկայացուցիչ Վարդան Հարությունյանի հետ և 100 հազար դրամ կաշառք առաջարկելով՝ պահանջել էր ձեռք բերել և իրեն տրամադրել ՀԱԿ-ի վստահված անձանց տրվող երկու չլրացված վկայական, իսկ հանրաքվեի օրը իր ասած ժամին որոշակի ժամանակով լքել քվեարկության սենյակը: Այդ զրույցն արձանագրող ձայնագրությունը ՀԱԿ խմբակցության ղեկավար Լևոն Զուրաբյանը փոխանցել էր գլխավոր դատախազ Գևորգ Կոստանյանին, և հարուցվել էր քրեական գործ։

Այս գործով դատավճիռը կհրապարակվի հունվարի 15-ին։