Այս իշխանության կեղտոտ քարոզչության արդյունքում է, թե՝ արցախցիները փախել են պատերազմից. Արցախում չես հանդիպի ընտանիք, որը մոտ շրջապատում չունի զոհ. պատգամավոր (տեսանյութ)

Այս տարիների ընթացքում՝ մինչև 2018 թվականը, Հայաստանը մեծածավալ ծրագրեր է իրականացրել Արցախում, էլ չեմ խոսում այն մեծածավալ սպառազինության մասին, որն անընդհատ մատակարարվել է և չեմ խոսում այն մասին, որ այս իշխանությունների օրոք Հայաստանից նույնիսկ զորակոչ չի գնում: Որևէ անգամ, սակայն, նախորդ իշխանությունները դա դրոշակ չեն դարձրել, որովհետև մենք համարել ենք, որ Արցախի պաշտպանությունը, Արցախի բնականոն զարգացումը ոչ միայն բարոյական նշանակություն ունի և ցանկացած իշխանության առաքելությունն է, այլև Արցախի անվտանգությամբ մենք ապահովել ենք Հայաստանի անվտանգությունը: Այս մասին այսօր «Հայելի» ակումբում ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը: 

«Այս իշխանությունը ցանկացած ծրագիր, որ իրականացնում է Արցախում, փորձում է ներկայացնել որպես լավություն: Կարծում են՝ դրանով մարդիկ պետք է կախվածության մեջ ընկնեն: Ո՞ւմ են պետք այդ սոցիալական ծրագրերը, եթե դու խլել ես այդ մարդկանց հայրենիքը, խլել ես հայրենի հողերը, իրենց հայրենակիցներին, իսկ Արցախում 900-ին հասնող զոհեր ունենք: Նույնիսկ պաշտոնական թվերով, եթե նայենք Արցախի և Հայաստանի բնակչության համամասնությանը, ապա 20-25 անգամ տարբերություն է, բայց զոհերի տարբերությունը 4-5 անգամ է: Այսինքն՝ Արցախում չես հանդիպի ընտանիք, որը մոտ շրջապատում չունի զոհ, հաշմանդամ... Ի դեպ, այս իշխանության կեղտոտ քարոզչության արդյունքում է, որ փորձում են ցույց տալ, թե արցախցիները չեն մասնակցել պատերազմին, փախել են և այլն: Իսկ այն մարդիկ, ովքեր գնում-գալիս են Արցախ, գերեզմաններ են այցելում, իրենք գիտեն՝ ինչ է եղել մինչև պատերազմը և ինչ վիճակ է պատերազմից հետո»,- ասաց Աբրահամյանը: 

Մանրամասները՝ տեսանյութում