Գիտենք, որ դեպուտատի եղբայրը՝ Գռզո ա անունը, անձամբ ներկա է եղել սպանությանը. Ապարանում սպանվածի հորեղբայր (տեսանյութ)

Արագածոտնի մարզում տեղի ունեցած կրակոցների հետևանքով սպանվածներից Համիկ Միքայելյանի հորեղբայրը նկատում է, որ դեպքը քաղաքական հողի վրա տեղի չի ունեցել, բայց մասնակցել է ՔՊ-ական պատգամավորի բարեկամը: Այդ մասին նա ասաց լրագրողների հետ զրույցում: Համիկ Միքայելյանի հորեղբայրը, Ապարան քաղաքի կենտրոնական հրապարակում վաղ առավոտից բողոքի ակցիա է իրականացնում հունիսի 19-ի արյունահեղության զոհ դարձած, ինչպես նաև ծանր վիրավոր մյուս տղաների հարազատների հետ:

Վերջիններս պահանջում են, որ արյունահեղություն կատարողները, իրենց ընտանիքների հետ միասին, չմտնեն Ապարան:

«Ինչ վերաբերում է խոսակցություններին, որ մի հոգի է եղել, մի հոգի չի եղել, մի հոգին չի կարա տենց բան անի: Ոստիկանությունն էլ չգիտեմ՝ ինչ ձև է աշխատում, որ զինված հանցավոր խումբ է գալիս Ապարան, մի քանի հոգի զինված մտնում, սպանում (վիրավորում) են 7-8 հոգու, որոնցից երկուսը մեռնում են, մեկը կյանքի համար պայքար է տալիս, մնացածն էլ վիրավորված՝ հիվանդանոցում: Մեր պահանջն է, որ այդ մարդիկ՝ Փարվանյան Էդգարը (Արագածոտնի փոխմարզպետ), դեպուտատը (ՔՊ-ական Մաթևոս Ասատրյանը) դեպուտատի ախպոր տղեն, անձամբ մասնակից են եղել, կազմակերպել են, կազմակերպողն էլ է մասնակից, ավելի վատ մասնակից, քան անողը, հորեղբոր տղերքը Փարվանյան Էդգարի՝ Ղարիբյան Կառլեն՝ հորքուրի տղեն ա…»,- ասաց նա:

Լրագրողների դիտարկմանը, որ թե' Արագածոտնի փոխմարզպետը, թե' ՔՊ-ական պատգամավորը հերքել են իրենց առնչությունը միջադեպին, սպանված երիտասարդի հորեղբայրն ասաց. «Իհարկե, կհերքի, ոչ մեկ չի ասի` բան եմ կազմակերպում, տեղյակ եմ ամեն ինչից, որ զինված խումբ է մտնում Ապարան, մարդ է մորթում… Ռոման Փարվանյանը՝ Էդգար Փարվանյանի հորեղբոր տղան... Իրենք ասում, կազմակերպում են, Ռոման Փարվանյանն էլ արդեն այստեղ է կազմակերպում, այդ խումբը մտնում է Ապարան ու էդ արյունահեղությունը կատարվում է… Տեղեկացված ենք, որ դեպուտատի եղբայրը՝ Գռզո ա անունը, անձամբ ինքը ներկա է եղել էս արյունահեղությանը»: