Ռուսաստանը հարմար պահի ռևանշի կհասնի Թուրքիայի նկատմամբ

Ռուս-թուրքական հարաբերությունների լարումից մինչև պատժամիջոցներ… Ինչու է Ռուսաստանը հետնահանջ կատարում և ինչ փուլ են թևակոխում ռուս – թուրքական հարաբերությունները: Այս և այլ հարցերի շուրջ newspress.am-ը զրուցեց թուրքագետ Գևորգ Պետրոսյանի հետ:

Վերջին օրերին Ռուսական լրատվամիջոցները կարծես թե չեն խոսում Թուրք – Սիրիական հատվածում ռուսական ակտիվության մասին: Արդյո՞ք Ռուսաստանը Թուրքիայի հետ հարաբերությունները կարգավորելու եզրեր է գտել:

Ռուսաստանի պաշտպանության նախարարությունից կրկին հայտարարություններ են եղել, որոնք նահանջողական չէի համարի: Եվ բացի այդ, անգամ տնտեսական պատժամիջոցների տեսանկյունից նոր քայլեր չանելով էլ՝ ստեղծված իրավիճակի պահպանումն ինքնին արդեն լուրջ գործընթաց է, քանի որ ժամանակի ընթացքում պատժամիջոցների ազդեցությունն ու հետևանքներն ավելի ակներև են լինելու, իսկ արդեն զբոսաշրջային սեզոնի բացման հետ Թուրքիայի տուրիստական կենտրոնները շատ ավելի զգալի կտուժեն այս իրավիճակից, եթե մինչ այդ փոփոխություններ չլինեն: Այնպես որ, պատժամիջոցների շարունակությունն ու պահպանումն ինքնին նույնպես ակտիվություն է:

Ի՞նչ արդյունք ունեցավ ռուսական ռազմարշավը:Ինչո՞ւ Ռուսաստանը չխփեց թուրքական որևէ  ինքնաթիռ այս ընթացքում:

Կարծում եմ՝ թուրքական կողմն ինքն էլ գնահատեց ՌԴ կողմի հնարավոր կտրուկ քայլերը և ավելի զգուշավոր թռիչքներ է իրականացնում թուրք-սիրիական սահմանին հարակից տարածքներում: Իսկ ռուսական կողմը նախընտրում է փուլ առ փուլ պատժամիջոցների կիրառումը՝ շեշտը դնելով տնտեսական ոլորտում, ինչն էլ զգալի վնասում է Թուրքիային: Ես կխուսափեի Ռուսաստանի քայլերը Թուրքիայի նկատմամբ կոչել «ռազմարշավ»: Սա ավելի շատ քարոզչական, տեղեկատվական և տնտեսական արշավ է, քան ռազմական: Պետք չէ բացառել, որ հարմար պահի Ռուսաստանը ռևանշի կհասնի Թուրքիայի նկատմամբ՝ համարժեք պատասխանելով իր գրոհիչի խոցմանը:

Արդյո՞ք Ռուսաստանը կհեռանա Սիրիական հատվածից և կրակային նոր թիրախ կորոնի:

Հստակ է, որ Ռուսաստանը Թուրքիայի նման քայլից հետո ոչ միայն չի հեռանա Սիրիայից, այլև կարող է և ավելի ակտիվացնել իր ներկայությունը, ընդ որում, շատ ավելի հետևողական խոցելով Սիրիայում գործող այն ուժերին ու նրանց զբաղեցրած տարածքները, որոնք Անկարայի ազդեցության գոտում են: Ռուսաստանում այս մասին արդեն հայտնել են, և ինչպես տեսնում ենք վերջին շաբաթների օրինակով, Ռուսաստանը չի լքել Սիրիան, և անգամ մտադրության մասին էլ խոսք չկա: Սիրիան կարևոր է Ռուսաստանի համար, ինչքան և կարևոր է Թուրքիայի համար, ուստի այստեղ պայքարը երկարաժամկետ է և բազմակողմանի: