Գործարարները Լարսի անցակետի հետ կապված խնդիրն ընդունում են իրենց բիզնեսի բաղկացուցիչ մաս. Վահան Քերոբյան

Այս տարվա զարգացումներին զուգընթաց կտրուկ ավելացել է Լարսի անցակետի վրա ճնշումը, և բազմաթիվ բեռնատարներ, որոնք առաջ ուղիղ Եվրոպայով մտնում էին Ռուսաստան, պետք է շրջանցեն այդ ամբողջ տարածաշրջանը։ Ամենամոտ անցակետը Լարսի անցակետն է։ Այս մասին ՀՀ կառավարության նիստից հետո լրագրողների հետ զրույցում ասաց ՀՀ էկոնոմիկայի նախարար Վահան Քերոբյանը։

Նախարարը նշեց, որ ինքը հունիսի 11-ին Վերին Լարսի անցակետում հանդիպել է ռուս գործընկեր Մաքսիմ Ռիշետնիկովի հետ, որպեսզի միասին տեսնեն, թե ինչ լուծումներ կարող են տալ, որպեսզի խնդիրը լուծվեր։

«Կարող եմ ասել, որ մեր պայմանավորվածության արդյունքում հունիսի 20-ին արդեն ՌԴ կառավարությունը որոշում է ընդունել երկրորդ մաքսազերծման զոնա բացել Վերին Լարսի անցակետի մոտակայքում, որն ըստ մեր գնահատականների՝ պետք է մոտավորապես 30%-ով ավելացնի թողունակությունը։ Դա այսօրվա 400, 450 ընդհանուր մեքենաների փոխարեն 600, 700 մեքենան է»,- նշեց Քերոբյանը՝ շեշտելով, որ խոսքն օրականի մասին է։

Անդրադառնալով առկա խնդրին՝ կապված ձկնեղենի և ծաղիկների հետ, Քերոբյանը նշեց․ «Մենք մեր վրացի գործընկերներին՝ վերջերս կատարած այցի ժամանակ, խնդրել ենք, որպեսզի ծաղիկներն ու թարմ ձուկը ևս մտցնեն արագ փչացող ապրանքների կատեգորիայի մեջ, որոնք կարողանան առանց հերթի անցկացնել Վրաստանի տարածքով և հնարավորինս արագ մոտենան Վերին Լարսի անցակետին։ Բազմաթիվ տնտեսվարողներ վնասներ են կրել։ Մենք դա տեսնում ենք և աշխատում ենք իրենց հետ։ Ընդհանուր առմամբ, մենք ուշադիր հետևում ենք իրավիճակին և պետք է դիտարկենք ժամանակի մեջ։ Այսինքն՝ եթե տնտեսվարողներն ինչ-որ պահի վնաս են կրել, բայց տարվա ընթացքում հնարավորություն ունեն վերականգնել իրենց վնասներն ու շահույթով աշխատել, ապա մենք դա համարելու ենք ընդամենը բիզնես ռիսկ։ Իսկ եթե տեսնենք, որ խնդիրը խորն է, ապա, բնականաբար, օժանդակության ծրագիր կմշակենք։ Հիմա, այս պահին, մենք փորձում ենք հնարավորինս արագ շտկել իրավիճակը։ Եվ մեզ համար իրավիճակի շտկելը Վրաստանում հերթերի բացակայությունն ապահովելն է»։

Քերոբյանը, սակայն նշեց, որ դեռ տեղեկություն չունի՝ ներառվել է ձկնեղենն անցնող մթերքների հետ, թե ոչ, բայց հավաստիացրեց, որ աշխատանքներ են տարվում, որպեսզի ձկնեղենն ընդգրկվի, ներառվի գյուղմթերքի հետ անցնելուն։ 

Հարցին, եթե տեղյակ չէ, ներառվել է, թե ոչ, ապա ինչպե՞ս տնտեսվարողները կարող են ապավինել նախարարությանն ու կառավարությանը։ Ի պատասխան, Քերոբյանը նշեց․ «Գիտե՞ք, ձեր նշած խնդիրը 20 տարեկան է, եթե ոչ 30։ Բոլոր տնտեսվարողները Լարսի անցակետի հետ կապված խնդիրն ընդունում են որպես իրենց բիզնես բաղկացուցիչ մաս։ Էսպես ասենք՝ տարվա ընթացքում ինչ-որ քանակի օրեր Լարսը փակ է լինելու, ինչ-որ քանակի խնդիրներ են լինելու, հերթեր են լինելու․․․ Դա արդեն այսպես ասած՝ հայկական բիզնես պլանների մեջ ներառված բիզնես ծախս է, ռիսկ է։ Այնուամենայնիվ, կարող եմ ասել, որ և՛ Էկոնոմիկայի նախարարությունը, և՛ Կառավարությունը համակերպված չեն այդ ռիսկի գոյության հետ։ Մենք ամեն ինչ անում ենք, որ այդ ռիսկն այլևս գոյություն չունենա և մեր տրանսպորտային ընկերությունները կարողանան շատ ավելի կանխատեսելի տրաֆիկով ճանապարհորդել դեպի Հայաստան»։