Թող իշխանությունները մտածեն, ուր ենք հասել, որ ազատամարտիկները նման քայլեր են կատարում. Ռազմիկ Պետրոսյան

Ես որպես  ազատամարտիկ  հակված  չեմ հավատալու, որ Հարություն  Սարիբեկյանը  կապ  ունի  հայրենիքի դեմ   ինչ- որ  գործողության  հետ, իշխանությունները  պետք է  լուրջ  մտահոգվեն  նրա  առողջությամբ»,- newspress.am-ի հետ զրույցում ասաց «Ազատամարտիկների Դաշինքի» համակարգող խորհրդի անդամ Ռազմիկ  Պետրոսյանը՝ անդրադառնալով ահաբեկիչների  գործով  կալանավորված  ազատամարտիկ Հարություն Սարիբեկյանին առաջադրված մեղադրանքին:

Ռազմիկ  Պետրոսյանն ընդգծեց, որ ազատամարտիկը  արդեն քսանինը  օր է, որ  հացադուլ է հայտարարել,  ինչպես նաև հայտնել է, որ ջրադուլ է  հայտարարելու. «Եթե իրոք  ահաբեկչական  խումբ էր, հիմա  արդեն բավականին  ժամանակ է անցել, կարող  էին մանրամասնել` ով  ինչ  է  արել, բայց եթե  շոու է, թող գոնե ազտամարտիկներին չներգրավվեն դրա մեջ: Ազատամարտիկը`  հայրենիքի  մասունքների,  հողի,  ընկերոջ  համար  կռվողը,  պետականությանը  չի  վնասի: Եվ եթե  ինչ-որ մասով մի բանի հետ էլ  կապ  ունենա, թող  իշխանությունները  մտածեն, ուր  ենք հասել, որ  ազատամարտիկները նման քայլեր են կատարում»,- մանրամասեց  նա:

«Զիմ» մականունով հայտնի ազատամարտիկը, Ռազմիկ  Պետրոսյանի  բնորոշմամբ՝ ակտիվ ազատամարտիկներից էր:

««Զիմին» մեղադրում են Արթուր Վարդանյանի խմբին զենք վաճառելու մեջ: Ըստ մեղադրանքի, «Զիմը» «մուխա» տեսակի զենք է տվել, գիտեք «Զիմը» չի ընդունում մեղադրանքը և ի նշան բողոքի՝ հացադուլի մեջ է,  բա  պիտի  լսել,  մարդուն  հասկանալ, թե  ինչ է  եղել»,-եզրափակեց  Ռազմիկ  Պետրոսյանը:

Նշենք, որ հանցավոր խմբի վնասազերծման շրջանակներում մոտ մեկ ամիս է, կալանավորված է ազատամարտիկ Հարություն Կնյազի Սարիբեկյանը` Զիմ մականունով:

«Զիմին» ձերբակալել են Նորք-Մարաշում վնասազերծված հանցավոր խմբին զենք վաճառելու մեղադրանքով: